Wp/tun/Tԑrashkisinku

Tԑrashkisinku halani

Tԑrashkisinku (Latini: Parthenocissus quinquefolia; Ingrasa: Virginia creeper; Pilanchi: herbe à cinq feuilles)

Tԑrashkisinku, hɔsani rihkunahku, ɔshta hishtahahk’ԑhԑ, tihikatԑpan, tashwalaka, tewali rakuku. Uhkeni utulehehta, kohin’ԑsa shumacha yakati. Takohin’ԑsa, tasahchuni choluhkuta. Uhkkohin’ԑsa nahchuhta, tԑrashkisinku, rihku hayishi hariya shukawishtuku. Uhktԑrashki tahԑsaninahku, uhkeninahku, choka sinku na’ara. Tihikatohku yukatihch, uhktԑrashki ɔshta humanahku hopiku. Tihika yukatihch, uhktԑrashki ɔshta hiyuhuninahku pirati. Sap’aratohku yukatihch, mili likahta pirati. Uhktԑnakɔla, rɔw’ɔshta, hԑntohku. Uhkelu mel’ɔshta kunasha yakati. Hali kichu, kata wishi munakati romantohkuhch, tԑrashkisinku rawishtuku.

Oni kayi uhkyatihch, Tachalakiku tԑrashkisinku mari chuwi. Hinyatihch, wishihiranyimohku, toniku soluwan, mashuku. Oni uhkpuhtitihch, Tahumaku tԑrashkisinku uhktԑrashki ɔshka hayiht’ama mari chuwi. Hinyatihch, wishihiranyimohku, toniku soluwan, mashuku. Oni tanahkarilɔpa uhkyatihch, tԑrashkisinku uhktԑrashki wishiyash’ama chuwi. Hinyatihch, toniku soluku. Tahumaku yimohkuhiranihta ɔshka hayishi tԑya tԑrashki puhti soluku.