Wp/tun/Sɛkana

Sɛkana (rihkusanu otisa sahu; Latini: Carya illinoinensis; Ingrasa: pecan; Pilanchi: pacanier)

Sɛkana, tihikatɛpan uhktɛrashki hotusinima patasitiman shukahksiti hat’ɛna. Ay’ɛhɛsht’ɛ kal’ura. Uhktahkishi kɔta; choka ɛsa na’ara. Uhktɛrashki amayisahkushtohku, yuru, tahɛsaninahku raku; tɛrashki utu sahku ura. Sɛkana uhkelu, kayi. Tosu tahawohkuni (wala mankutahki) kichu, tahkishi shumacha kichu, ta’elu ura. Tahch’aruwina Tehukuma yukatihch, uhktosusinima patahksiti. Hinyatihch, Tahch’asap’ara panutihch, hotuti. Sɛkana, titiht’ɛ rɔhpant ra uhkelukati.

Sɛkana halani

Onisɛma, sɛkana elu sakukata. Tayoroniku-Tahalayihku, sɛkana paluhkuta. Tachalakiku, elu tomu, kucha mashuwan, uhkpɔhtahkuta. Hinakuhch, kucha kichu, wishi lehkiwihch, sakuku. Oni uhksepitihch, tasɛkana chuku uhklamaniwan. Oni uhkchahkatihch, ahak’ihch ushohu yasha uhkyatihch, tahkishi talu chumariwihch, uhklamahkuta. Tasɛkana uhkrihku, lɔhka hotuwan, ahak’ihch chehkini haluhta mashuwan, chumariku.