Wp/tun/Rusa

Rusa (humamelirusa otisa sahu; Latini: Rubus spp.; Ingrasa: blackberry; Pilanchi: éronce)

Halani humamelirusa uhkelu

Rusa rihkutohku kochu. Rusa ɔshka haluhta tihikatɛpan rakushkan, ɔshka hayishi tihika ilishtahahki raku. Tihika ilihta yukatihch, ɔshka hayishi kɔla eluku. Chahka, ɔshka hayishi, na'ara. Rusa uhktɛrashki uhkeninahku, choka namu. Wɛhatahani choka sinku ahak’ihch tayihku na’ara. Uhktɛnakɔla rɔwa ahak’ihch milisha. Uhkelu, huma. Uhksam’akihch, meli.

Oni tashkirupamili yatihch ahak’ihch uhktayishi lapuya munawik’ahahch, Tachahtaku rusa ɔshka mari chuku. Hinyatihch, wishihiranyimohku mashuku. Tachalakikɔt, oni uhkrupatihch ahak’ihch uhktahki yasha yatihch, rusa ɔshka wishiyimohku mashuku. Oni uhkpuhtitihch ahak’ihch oruhchohu yasha yatihch, hɛwishiyimohku lapu. Oni uwitan ahpuku. Hinahkuhch oni lapuya woluwishtuk'ɔhɔhch, rusa wishiyimohku lapu. Oni uhkkɔraku.