Wp/tun/Kehi

Kehi (Latini: Nelumbo lutea; Ingrasa: yellow lotus; Pilanchi: volée)

Kehi halani

Kata wishipɛta, wishiheluni, tami arahch, kehi rawishtuku. Wishi haluhta, hal’upishi kichu, kehi ɔshka kiraku. Uhktɛrashki uhktɛnakɔl’ama, wishi hayihta hopi raku. Tɛrashki sahku, tika, kɔra wishi hayihta poruku. Kehi tɛnakɔla tika, kayi. Elu hayihku eluwihch, tosu tika, elu kichu na'ara.

Takiriyɔlku kehi tosu sama ahak’ihch ɔtakahch, uhksahkuku. Onmahoni tasapashtihkisɛma, kehi tosu chu marikata. Hinyatihch, tosu tishum’ama ahak’ihch hahkatin’ɛma sam’anta. Kehi ɔshka sakuwan, kɔwakata, uhkpɔhtahkanta. Sɛma, sap’ara yukatihch, kehi ɔshka sakuwan, ha'uhkwɛrakata. Wulini uhkpohtukata, rahku sihuhkanta.