Wp/tun/Hisawa

Hisawa (Latini: Sanguinaria canadensis; Ingrasa: bloodroot; Pilanchi: sang-dragon)

Hisawa kɔlaku tihikatɛpan. Hisawa akuhpani raku, hali haluhta wala raku. Ɔshka kayi, lohpu. Tihikatohku lahoni yukatihch, hisawa hopiku. Uhktɛnakɔla sahku, rɔwa; uhktɛnakɔla tɛhkala, kayi. Uhktɛrashki kɔra hayihta, utu namu na’ara. Oni hisawa pohtuwihch, ɔshka haluhta ahak'ihch ɔshka hayishi lihchahta mili homunaku. Uhktosu tolu, mili ahak’ihch meli. Kata hali lihcha, eshku arahch, hisawa lapuya raku.

Sap'aratohkutɛpan, Tayoroniku hisawa uhktosu chu mariku. Tihikatohku yukatihch, uwi tosu tapaku. Hisawa ɔshka haluhta chuwihch, Tayoroniku ala mili kowiku. Ɔshka haluhta al'ama pɔhtahkuta, ashutayi sahku ahahk'ihch ili. Uwi ala mili tayishinahku mashuku. Tachalakiku hisawa chuwipan. Uwi kowi mili mashuku. Tachalakiku oruhchohuhirani mashuku. Oni uhktahkishihta lihpu na'arahch, hisawa wishihiranyimohku chuwihch, sihihkuta.