Wp/tun/Eluna

Eluna (shukara otisa sahu; Latini: Phytolacca americana; Ingrasa: pokeweed; Pilanchi: chou-gras)

Eluna, yimohku tika. Tihikatɛpan lupiwishkan, tihikatɛpan hat'ɛna eluna ɔshka raku. Eluna ɔshka haluhta yuru, tupa, rɔwa. Eluna ɔshka hayishi, tihika yukatihch, mili yakati. Uhktɛrashki amayisahkushtohku, kɔrasha, ɔshta likahta hiyuhuninahku. Oni eluna tɛrashki kuchawihch, namikati. Eluna elu ɔshta kunasha humanahku ahak’ihch meli. Kuwatohkusinima eluna uhkelu sakusitishkan, onisɛma, uhkelu sakutashtuk'ɔhɔ; sihkyahputi.

Wɛhatahani Tachalakiku eluna chu mariku. Tihikatohku lahonitohku yatihch, ɔshka hayishi nisara sakuku. Oni uhktahkishi uhkpuhtitihch ahak’ihch uhkyuritihch, eluna yimohkucha mashuku. Teshkunrahiniku uhkarhilanɛt, Taninita’erihchi eluna uhkelu chutiman kukuchakati. Tashikatɛkahaku ukiku, tɔkashiku lup’uhkiku niyuwi.