Wp/tay/’nxan na mlikuy ro knerin Tayal

From Wikimedia Incubator
< Wp‎ | tayWp > tay > ’nxan na mlikuy ro knerin Tayal
Jump to: navigation, search

’nxan na mlikuy ro knerin Tayal(男女成長)

Tayal bih llyung Klesan hiya, kahun slungan naha pnhkngyan yaba, yaya, ro pncba’an naha, trang nyan mbhoyow la’iy ga, musa naha ba’un tmwang tkba’an na gaga ro yow na s’yanux uy. iyik yow na tkba’an s’yanux hiya, skura la’iy mlikuy ga lmon mcba’ yow na gaga mluyak, la’iy knerin hiya ga pnba’ yow na cinun ro pnba’ mlahang sali, nya smungus tyaba la’iy laga, musa maki piying c’rux utux Sali, ro thoyey tbuci m’yanux. Skura tkba’an na mlahang gaga hiya ga, piyang nya ga snrhow na bnkisan, mwah mcba’ la’iy kwara yow na gaga ’nxan alang ta, mbhoyow naha laga, maki alang ga iyat nanak kba’ m’yanux, kba’ mwah mlahang gaga uy.

skura tkba’an na s’yanux cyoli na llyung Klesan hiya, kwara tkba’an la’iy hiya ga nyan ubuy pnslungan naha s’yanux yaba, yaya kwara, ini maha pyangan musa tmwang tkba’. yani maha: tiyu, pitu kawas la’iy mlikuy ga musa t’aring row tmutu khoni’ ro tiyow yow na mayah, kruma ga gmluw yaba musa mluyak, la’iy kneri hiya, aring payat, magan kawas laga mhyapas psulung mahu’ lukus, cinun, ro thapuy mami. la’iy ana maki sali, ini ga gluw yaba, yaya musa tiyow mayah, kwara pnba’ naha ro sn’lungan naha ga knahun kntegan ro pnslungan naha tyagan na yaba ro yaya.

mpuw kawas laga, yaba, yaya ga t’aring sgsuw ci baley cba’ yow na mluyak ro na cinun, cba’ yow na gaga mluyak ro cba’ gaga sn’asan na ryax, ro gaga na psani’. skura yow la’iy mlikuy hiya, baha mcya, musa mluyak iyat nanak maki piying ro gaga nya, mnanak ga siga myasa tunux nya uy, musa nya ba’un maha nanu sbaley innglisan ro ya’eh yow, siga tmwang pnba’ yow krryax. skura la’iy knerin hiya, piyang na pnba’ gaga s’yanux hiya ga yow na cinun. ba’ ci cinun knerin ga trhwun cyoli, piyux cyoli ksli’ hiya, babow nya ga piyux cinunan nya pala ga tmwang ’uluw btiyux, ana ima ini kba’ cinun ga p’sya’an cyoli ro putut san naha kmayal. Siga beta ba’un naha kwara yow na s’yanux laga, la’iy mlikuy ro knerin ga ana ba’un matas reyas naha, kwe ga nya pkita maha nya ba’ m’yanux kwara naha ro nya mrkyas la.

tekun kawas kwara naha laga, p’yugan kwara mbkal na msswe uy la, trang la’iy tipik naha ga si so’un tisan krryax, ana ga trang mpuw kawas laga, la’iy knerin hiya ga ini hmut maki gleng na suyan nya mlikuy uy la, ana maha nya mkayal yow gluw suyan nya mlikuy ga si pgey sswe knerin hiya, t’lu ana nanu yow msswe hiya ga, siga mung ke suyan sswe, mnanak ga mung ke suyan nya nanak sswe knerin hiya.

Tyaba la’iy mlikuy hiya ga mwah mpanga yow knhangan na Sali, mbkis hiya, skura naha tyaba la’iy hiya ga t’aring cba’ maha nanu mlahang gaga na s’yanux Tayal, mnanak skura mlikuy ga cyan naha lungan ro sgsuw ci nya naha baley, skura snan naha knerin hiya ga ssuw ro scayux ha’iy ga pnkita cntman na la’iy knerin.

gaga na bnkisan Tayal bih llyung Klesan hiya, htagan la’iy mlikuy ga galan naha mwah psyanow buli utux Sali, ini ga san naha mwah rmow tiyow yaba, s’asan ci yow na naha, ana ga htgan la’iy knerin ga, kmayan bkis maha Sali la’iy knerinn ga halan ta mita babow nya, ini ga knerin hiya ga pkita maha ana maha nanu musa ci maki nni’an ta, nya skayal sapat ni’an ta babow nya uy, musa ta ba’un kmayal maha cyoli Tayal bih llyung Klesan hiya ga tna’an naha cmi inlungan kwara la’iy mlikuy, ro la’iy knerin naha baley.