Wp/syl/ꠝꠢꠞꠝꠞ ꠢꠣꠋꠉꠣꠝꠣ

From Wikimedia Incubator
< Wp‎ | syl
Wp > syl > ꠝꠢꠞꠝꠞ ꠢꠣꠋꠉꠣꠝꠣ

১৭৮২ ꠞ ꠍꠤꠟꠐ ꠛꠤꠖ꠆ꠞꠧꠢ ꠛꠣ ꠝꠢꠞꠝꠞ ꠢꠣꠋꠉꠣꠝꠣ (ꠁꠋꠟꠤꠡ: Sylhet uprising of 1782), ꠅꠁꠟ ১৭৮২ ꠡꠣꠟꠞ ꠒꠤꠡꠦꠝ꠆ꠛꠞꠧ, ꠀꠞꠛꠤ ꠝꠢꠞꠝ ꠝꠣꠡꠞ ꠚꠄꠟꠣ ꠖꠤꠘ, ꠍꠤꠟꠐꠞ ꠝꠥꠍꠟꠝꠣꠘ ꠅꠈꠟꠞ ꠛ꠆ꠞꠤꠐꠤꠡ ꠅꠞ ꠛꠤꠚꠇ꠆ꠇꠦ ꠛꠤꠖ꠆ꠞꠧꠢ⁕ ꠍꠤꠟꠐꠞ ꠝꠥꠍꠟꠝꠣꠘ ꠅꠈꠟꠞ ꠘꠦꠔꠣ ꠀꠍꠟꠣ ꠚꠤꠞꠎꠣꠖꠣ ꠖꠥꠁ ꠜꠣꠁ ꠍꠁꠅꠖ ꠝꠥꠢꠣꠝ꠆ꠝꠖ ꠝꠣꠢꠖꠤ ꠀꠞ ꠍꠁꠅꠖ ꠝꠥꠢꠣꠝ꠆ꠝꠣꠖ ꠢꠣꠖꠤ⁕ ꠁꠇꠐꠣ ꠅꠁꠟ ꠃꠙꠝꠢꠣꠖꠦꠡꠞ ꠚꠄꠟꠣ ꠛ꠆ꠞꠤꠐꠤꠡ ꠛꠤꠞꠥꠗꠤ ꠀꠘ꠆ꠖꠧꠟꠘ⁕ ꠝꠥꠟ ꠝꠣꠁꠞ ꠅꠁꠍꠦ ꠡꠣꠢꠤ ꠁꠖꠉꠣꠢ ꠀꠞ ꠄꠞ ꠈꠣꠘ꠆ꠖꠣꠞ ꠐꠤꠟꠣ ꠅꠔꠣꠛꠣꠄ⁕

ꠀꠉꠞ ꠊꠐꠘꠣ[edit | edit source]

১৭৭৮ ꠁꠋꠞꠦꠎꠤꠔ ꠛ꠆ꠞꠤꠐꠤꠡ ꠁꠡ꠆ꠐ ꠁꠘ꠆ꠒꠤꠀ ꠇꠧꠝ꠆ꠙꠣꠘꠤꠄ ꠞꠛꠣꠞ꠆ꠐ ꠟꠤꠘ꠆ꠒꠍꠦꠞꠦ ꠍꠤꠟꠐꠞ ꠇꠣꠟꠦꠇ꠆ꠐꠞ ꠢꠤꠡꠣꠛꠦ ꠑꠤꠇ ꠇꠞꠦ⁕ ꠁ ꠡꠝꠄ, ꠟꠤꠘ꠆ꠒꠍꠦ ꠡꠥꠞꠥ ꠈꠞꠦ ꠍꠤꠟꠐꠞ ꠍꠥꠘꠣ, ꠛꠦꠔ, ꠉꠥꠀ, ꠟꠥꠀ, ꠀꠔ꠆ꠔꠤ ꠀꠞ ꠎꠣꠎꠞ ꠈꠣꠞꠛꠣꠞ⁕ ꠍꠤꠟꠐꠞ ꠡꠝ꠆ꠙꠖ ꠟꠥꠐ ꠈꠞꠤꠀ ꠛꠣꠇ꠆ꠇꠣ ꠐꠦꠈꠣꠞ ꠝꠣꠟꠤꠇ ꠛꠘꠤꠎꠣꠄ ꠟꠤꠘ꠆ꠒꠍꠦ, ꠟꠉꠦ ꠀꠍꠤꠟ ꠉꠞꠤꠛ ꠈꠦꠔ ꠈꠞꠞꠣ ꠝꠣꠘꠡꠞ ꠃꠚꠞꠦ ꠈꠥꠛ ꠛꠦꠡꠤ ꠈꠣꠎꠘꠣꠞ ꠎꠥꠟꠥꠝ⁕ ꠄꠞꠟꠣꠉꠤ ꠀꠍꠔꠣ ꠍꠤꠟꠐꠞ ꠝꠣꠘꠥꠡ ꠔꠣꠞ ꠃꠚꠞꠦ ꠘꠣꠞꠣꠎ ꠀꠍꠟꠣ⁕ ১৭৮১ ꠡꠣꠟꠞ ꠛꠣꠘꠧ ꠀꠍꠔꠣ ꠍꠤꠟꠐꠞ ꠈꠦꠔ ꠀꠞ ꠚꠡꠟ ꠘꠡ꠆ꠐ ꠅꠁꠀ ꠍꠤꠟꠐ ꠃꠚꠣꠡꠤ ꠖꠦꠈꠣ ꠖꠤꠟ⁕ ꠍꠤꠟꠐꠞ ৩ ꠛꠣꠐꠞ ১ ꠛꠣꠐ ꠝꠣꠘꠥꠡ ꠘꠣ ꠈꠣꠁꠀ ꠝꠣꠞꠣ ꠉꠦꠍꠟ ꠅꠃ ꠈꠣꠞꠘꠦ⁕ ꠇꠤꠘ꠆ꠔꠥ ꠅꠃ ꠡꠝꠄꠅ ꠛ꠆ꠞꠤꠐꠤꠡꠦ ꠍꠤꠟꠐꠞ ꠝꠣꠘꠡꠞ ꠉꠦꠍ ꠕꠣꠇꠤ ꠈꠣꠎꠘꠣ ꠟꠁꠍꠦ⁕ ꠏꠞꠘꠣꠞ ꠚꠣꠞꠞ ꠍꠁꠅꠖ ꠛꠣꠠꠤ ꠀꠍꠔꠣ ꠍꠤꠟꠐ ꠅꠞ ꠝꠣꠏꠦ ꠝꠣꠘꠤ ꠄꠈ ꠚꠞꠤꠛꠣꠞ ꠀꠍꠤꠟ, ꠔꠣꠘꠔꠣꠘ ꠇꠥꠞꠍꠤ ꠡꠣꠢ ꠎꠣꠟꠣꠟꠞ ꠄꠈ ꠝꠥꠞꠤꠖꠧ ꠉꠤꠀ ꠝꠤꠟꠍꠦ⁕ ꠍꠁꠅꠖ ꠛꠣꠠꠤꠞ ꠘꠣꠝꠒꠣꠈ ꠀꠍꠔꠣ ꠛꠣꠋꠟꠣ ꠀꠞ ꠀꠡꠣꠝꠧꠅ ꠀꠍꠤꠟ⁕

ꠛꠤꠖ꠆ꠞꠧꠢꠞ ꠖꠤꠘ[edit | edit source]

ꠝꠢꠞꠝꠞ ꠢꠣꠘꠎꠣꠛꠣꠟꠣ, ꠚꠤꠞꠎꠣꠖꠣ ꠖꠥꠁꠅ ꠜꠣꠁꠄ ৩০০ ꠝꠣꠘꠥꠡ ꠟꠁꠀ ꠔꠣꠎꠤꠀ ꠝꠤꠍꠤꠟ ꠛꠣꠈꠞꠁꠘ⁕ ꠝꠤꠍꠤꠟ ꠡꠣꠢꠤ ꠁꠖꠉꠣꠢꠔ ꠎꠣꠄ⁕ ꠔꠣꠘꠔꠣꠘ ꠟꠉꠦ ꠔꠈꠘ ꠖꠣ, ꠔꠞꠛꠣꠞꠤ ꠀꠍꠟ⁕

ꠟꠤꠘ꠆ꠒꠍꠦ ꠡꠞꠈꠣꠞꠞ ꠇꠣꠍꠦ ꠄꠈ ꠍꠤꠑꠤꠔ ꠟꠦꠈꠍꠦ ꠝꠥꠍꠟꠝꠣꠘ ꠅꠈꠟꠦ ꠚꠄꠟꠣ ꠖꠦꠅꠀꠘ ꠝꠣꠘꠤꠇ ꠌꠣꠖꠞꠦ (ꠛ꠆ꠞꠤꠐꠤꠡꠞ ꠡꠞꠤꠇ) ꠝꠣꠞꠤꠀ ꠀꠍꠔꠣ ꠐꠣꠃꠘꠞ ꠛꠣꠇ꠆ꠇꠣ ꠎꠣꠉꠣꠔ ꠀꠉꠥꠘ ꠗꠞꠣꠁꠀ ꠖꠤꠟꠣꠁꠘ⁕


ꠟꠤꠘ꠆ꠒꠍꠦ ꠛꠣꠖꠦ ꠍꠤꠟꠐꠞ ꠙ꠆ꠞꠗꠣꠘ ꠇꠣꠘꠥꠘꠉꠧ ꠝꠣꠍꠥꠖ ꠛꠈꠔ ꠞꠦ ꠢꠥꠇꠥꠝ ꠖꠦꠄ ২০ ꠡꠤꠙꠣꠁ ꠟꠁꠀ ꠡꠣꠢꠤ ꠁꠖꠉꠣꠢꠔ ꠎꠣꠅꠀꠞ, ꠀꠞ ꠛꠣꠖꠦ ꠢꠦ ꠘꠤꠎꠦ ꠀꠞꠧꠅ ৩০ ꠎꠘ ꠡꠤꠙꠣꠁ ꠟꠁꠀ ꠡꠞꠤꠇ ꠅꠄ⁕ ꠟꠤꠘ꠆ꠒꠍꠦ ꠛꠤꠖ꠆ꠞꠧꠢꠤ ꠅꠈꠟꠞꠦ ꠀꠞ ꠡꠤꠇꠣꠞ ꠈꠞꠣꠞ ꠟꠣꠉꠤ ꠈꠁꠟꠦ ꠅ, ꠝꠥꠍꠟꠝꠣꠘ ꠅꠈꠟ ꠞꠣꠎꠤ ꠅꠁꠘ ꠘꠣ ꠀꠞ ꠔꠣꠁꠘ꠆ꠔꠣꠁꠘ ꠈꠣꠘ꠆ꠖꠣꠞ ꠐꠤꠟ꠆ꠟꠣ ꠅꠔꠣꠛꠣꠄ ꠎꠣꠁꠘ ꠉꠤ⁕ ꠔꠣꠘꠔꠣꠘꠞ ꠚꠤꠍꠦ ꠚꠤꠍꠦ ꠎꠣꠄ ꠟꠤꠘ꠆ꠒꠍꠦ ꠀꠞ ꠔꠣꠞ ꠡꠦꠙꠣꠁ ꠅꠈꠟ⁕ ꠟꠤꠘ꠆ꠒꠍꠦꠞ ꠟꠉꠦ ꠟꠣꠠꠣꠁ ꠅꠄ ꠍꠁꠅꠖ ꠢꠣꠖꠤꠞ, ꠔꠞꠛꠣꠞꠤ ꠖꠤ⁕ ꠍꠁꠅꠖ ꠡꠣꠛꠦ ꠟꠤꠘ꠆ꠒꠍꠦꠞ ꠔꠞꠛꠣꠞꠤ ꠜꠣꠋꠉꠤꠟꠤꠟꠦ, ꠟꠤꠘ꠆ꠒꠍꠦꠞ ꠎꠝꠣꠖꠣꠞꠦ ꠔꠣꠞ ꠀꠔ ꠙꠤꠍꠔꠟ ꠖꠤꠟꠣꠄ⁕ ꠀꠞ ꠟꠤꠘ꠆ꠒꠍꠦ ꠉꠥꠟ꠆ꠟꠤ ꠈꠞꠤꠀ ꠡꠢꠤꠖ ꠈꠞꠦ ꠍꠁꠅꠖ ꠢꠣꠖꠤꠞꠦ⁕

ꠢꠣꠖꠣ ꠝꠤꠀ ꠀꠞ ꠝꠣꠖꠣ ꠝꠤꠀ ꠖꠥꠁꠅꠎꠘ ꠚꠤꠞꠎꠣꠖꠣ ꠁ ꠢꠣꠋꠉꠣꠝꠣꠔ ꠝꠣꠞꠣ ꠎꠣꠁꠘ⁕

ꠜꠛꠤꠡꠡꠔꠚꠟ[edit | edit source]

ꠢꠣꠋꠉꠣꠝꠣ ꠡꠦꠡ ꠅꠁꠟꠦ, ꠟꠤꠘ꠆ꠒꠍꠦ ꠔꠣꠞ ꠖꠥꠇ ꠚꠣꠅꠀ ꠡꠤꠙꠣꠁ ꠅꠈꠟ ꠟꠁꠀ ꠔꠣꠞ ꠐꠤꠟ꠆ꠟꠣꠔ ꠎꠣꠄ, ꠎꠦꠘ ꠔꠣꠞ ꠒꠣꠈꠔ꠆ꠞ ꠎꠘ ꠢꠤꠟ꠆ꠐꠘꠦ ꠁꠔꠣꠞꠦ ꠛꠦꠘ꠆ꠒꠤꠎ ꠈꠞꠤꠀ ꠖꠦꠄ⁕ ꠢꠣꠖꠣ ꠝꠤꠀ ꠀꠞ ꠝꠣꠖꠣ ꠝꠤꠀꠞꠦ ꠈꠛꠞ ꠖꠦꠅꠀ ꠅꠄ ꠡꠣꠢꠤ ꠁꠖꠉꠣꠢꠞ ꠈꠣꠘ꠆ꠖꠣꠔ ꠎꠦꠈꠣꠘ ꠄꠛꠟꠣ ꠘꠄꠀꠡꠠꠈ ꠝꠣꠖ꠆ꠞꠣꠡꠣꠞ ꠚꠥꠛꠦ⁕

ꠡꠣꠢꠤ ꠁꠖꠉꠣꠢꠞ ꠃꠔꠞꠞ ꠐꠤꠟ꠆ꠟꠣ ꠍꠁꠅꠖ ꠢꠣꠖꠤ ꠀꠞ ꠍꠁꠅꠖ ꠝꠣꠢꠖꠤꠞ ꠘꠣꠝꠦ ꠘꠣꠝ ꠖꠦꠅꠀ ꠅꠁꠍꠦ, ꠅꠃ ꠐꠤꠟ꠆ꠟꠣꠔ ꠃ ꠔꠣꠁꠘ꠆ꠔꠣꠁꠘ ꠡꠢꠤꠖ ꠅꠁꠍꠟꠣ⁕

ꠀꠞꠅ ꠖꠦꠈꠇ꠆ꠇꠣ[edit | edit source]

  • ꠍꠤꠟꠐ ꠛꠤꠎꠄ