Wp/sjd/Эӈгельскэ кӣлл

Эӈгельскэ кӣлл
English
Е̄ммьне, касьт эӈгельскэ кӣлл лӣ национальнэ кӣлл вай я̄наш е̄ннҍкӣлл      Е̄ммьне, касьт эӈгельскэ кӣлл лӣ офицьяльнэ, ноа элля я̄наш кӣлл
Ланҍ	АЭ̄Ш Шӯрр Британия Канада Австралия САР Ирландия О̄дт Зеландия
Па̄ҋк	пугк э̄ллманнт
Са̄ррнэй	Гу авьтма кӣлл: 380 млн (2021) Гу ныммьп кӣлл: 1,077 млрд (2021) Пугк: 1,457 млрд
Кырьйхэмна̄лль	латинэһць (эӈгельскэ алфавиһт)
Класслаһтҍмушш	--
Индоевропейскэ кӣлэ пӣрас Германскэ кӣл Вуэррьял германскэ кӣл Аӈгла-фрӣсскэ кӣл Эӈгельскэ кӣлл
Алльтламусс ро̄дт кӣлл	скотс кӣлл
Офицьяльнэ ста̄тусс	57 воа̄ллтланнӭ 30 ва̄лтхэмь е̄ммьнедтӭ я югкеналшэм организацъя (Э̄НО, Европа Эхтнэгк я мудта)
Кӣллко̄д
ISO 639-1	en
ISO 639-2	eng
ISO 639-3	eng
Википедья эӈгельскэ кӣлэсьт

Эӈгельскэ кӣлл (эӈг. English), ныдтҍшэ английскэ кӣлл вай иӈглиш кӣлл лӣ вуэррьял германскэ кӣлл я шурьмусс нарэдэ кэска тӣдҍнэдтэм кӣлл э̄ллмантэсьт. Ныдтҍшэ со̄нн лӣ я̄наш о̄ллмэдтӭ шаннт кӣлл Шӯрр Британиясьт, Америка Э̄ххтма Шта̄тэнҍ, Канадасьт, Австралиясьт, Ирландиясьт, О̄дт Зеландиясьт я мудта лэнӭнҍ.

Алфавиһт

Эӈгельскэ кӣл алфавитэсьт лӣ 26 бӯквэдтӭ.

A a	B b	C c	D d	E e	F f	G g
H h	I i	J j	K k	L l	M m	N n
O o	P p	Q q	R r	S s	T t	U u
V v	W w	X x	Y y	Z z

Диалект я варьянт

Эӈгельскэ кӣлэсьт лӣ е̄ннэ диалектэдтӭ я региональнэ варьянтэдтӭ.
Тэгка ле̄в не̄лльй эӈгельскэ кӣл шурьмусс варьянтэнҍ:

• Американскэ эӈгельскэ кӣлл
• Британскэ эӈгельскэ кӣлл
• Канадскэ эӈгельскэ кӣлл
• О̄дт-Зеландскэ эӈгельскэ кӣлл

Эӈгельскэ кӣл орфографьяе ка̄нҍц коа̄нҍцэнҍ ме̄ррьдэмушш

	АЭ̄Ш	Канада	Шӯрр Британия	Шӯрр Британия (Оксфорд орфографья)	Австралия
“ыввьн”	color	colour	colour	colour	colour
“кэ̄сск”	center	centre	centre	centre	centre
“глобализация”	globalization	globalization	globalisation	globalization	globalisation
“оа̄нтшэ, то̄ӆӆькъе, та̄йе”	realize	realize	realise	realize	realise
“анализируввэ”	analyze	analyze	analyse	analyse	analyse
“воа̄ррдэй; воа̄ррдмэнҍ”	traveling	travelling	travelling	travelling	travelling
“пынньмушш, пя̄ллшэмушш”	defense	defence	defence	defence	defence
“коаммпьютэр программа”	computer program	computer program	computer program	computer program	computer program
“концэрт программа”	concert program	concert program	concert programme	concert programme	concert program
“ра̄нӭсь”	gray	grey	grey	grey	grey
“ӣллькъе”	fulfill	fulfil(l)	fulfil	fulfil	fulfil
“алюминий”	aluminum	aluminum	aluminium	aluminium	aluminium

Исторья

Е̄рркъя эӈгельскэ латинскэ кырьйхэмна̄лль. Авьтмусс Беовульф (е̄рркъя эӈгельскэ э̄пос) лысст

• Е̄рркъя эӈгельскэ кӣлл (6.–11. эгенҍ 1066 ыгь райя)

5. агь кэскэсьт пӯдтӭнҍ е̄рркъя германла – ю̄т, а̄ӈгла я са̄кс о̄ллмэ – Британскэ сӯллэтҍ; та̄ррьмъя аӈгла ле̄в сӣн пуллдэг. Танна сӣн кӣлл ля̄йй мудта германскэ кӣлэ налшэм, я 10. агь кэск райя со̄нн эллий е̄ннэ воа̄йхуввма.

Британия вуэннҍт о̄ллманҍ лӣйенҍ ке̄льт, ко̄йтгуэйм германла тӯрнӭнҍ; 80 соа̄нӭ райя эӈгельскэ кӣлле лӣ ке̄лльт кӣлэнҍ пуадтма, ва̄лльтэ clan – «ро̄дт, о̄ллмэ», whisky – «вӣски». Е̄намп соа̄нӭ пӯдӭ эӈгельскэ кӣлле латин кӣлэсьт рӣмм о̄ллмэгуэйм, ко̄йн воа̄лтэсьт Британия па̄ҋҋк 400 ыгке баяс ля̄йй. Кэскэсьт тэйта соа̄нӭ ле̄в:

– street «чуэкас» — лат. strata via;

– wall «сте̄нн» — лат. vallum;

– wine «выннҍ» – лат. vinum;

– pear «грӯша» – лат. pira;

– cheese «сырр» – лат. caseus;

– pall «пла̄шш» – лат. pallium.

Е̄рркъя эӈгельскэ кӣлэсьт кырьйхэшь аӈгла-са̄кс рӯнагуэйм:

Латинэһць оа̄лкэһтҍ о̄ннъюввэ 7. агесьт, я со̄нэсьт ля̄йй мэ̄ннля̄ннчве̄рьт лашшь бӯквэдтӭ: ð, ƿ, þ я мудта.

• Кэ̄сск эӈгельскэ кӣлл (ыгь 1066–1450)

• О̄дт эӈгельскэ кӣлл (15. агь ке̄жесьт мӣн пӣйвэ райя)

Соа̄нӭ руэһк

Маль 60% эӈгельскэ кӣл соа̄нӭ пӯдӭ латин кӣлэсьт я мудта романскэ кӣлэнҍ:

• Фра̄нскэ кӣлэсьт: 29,3%;
• Латин кӣлэсьт: 28,7%;
• Германскэ кӣлэнҍ: 24% – кэскэсьт сӣнэ ле̄в е̄рркъя эӈгельскэ кӣлл (ныдтҍ лӣ ӣжесь са̄нҍ) я е̄рркъя скандинавскэ кӣлл;
• Гре̄цкэ я е̄рркъя гре̄цкэ кӣл: 5,32%;
• Итальянскэ, спа̄нскэ я португальскэ кӣл: 4,03%;
• Ӣжесь нэ̄мэнҍ шэ̄ннтма: 3,28%;
• Мудта кӣлэнҍ: ва̄ннса 1%.

Грамматика

Местоименья

Ӣжесь местоименья

Ка̄ссв, числа	Нэ̄ммдэм падешш	Поаннь падешш
1-ма к., э̄ххт ч.	I	me
2-пь к., э̄ххт ч.	you (вуам. thou)	you (вуам. thee)
3-нт к., э̄ххт ч.	he/she/it*	him/her/it*
1-ма к., е̄нас ч.	we	us
2-пь к., е̄нас ч.	you	you
3-нт к., е̄нас ч.	they	them

* югкена̄лшэм ро̄дэ местоименья: he – оалм ро̄дт, she – нызан ро̄дт, it – кэ̄сск ро̄дт