Wp/sjd/Куэмдас
Куэмдас (тарьяс кыэмдӭсь,[1] таввьса̄мас goavddis вай meavrresgárri, соа̄й.-са̄мас gievrie) лӣ са̄мь нуэййт барбанн. Са̄мь культурасьт куэммдсэсьт ля̄йй шӯрр а̄ррввудт: со̄нн о̄ннъювэ нуэййтэм гуэйкэ я тӯе пуадтмужэ тӣдҍсэм гуэйкэ, со̄н вӣкенҍ воа̄лшэллэшь ме̄һцьтэм гуэйкэ ужэтҍ; куэмдас ля̄йй шурьмусс нуэйт лыһкэмка̄ввьнэнҍ.
Ле̄в кӯһт шурьмусс куэммдас на̄ль:
- На̄пь-налшэм (таввьса̄мас goavddis), па̄гкесьт лыһкма;
- Ра̄м-налшэм (соа̄й.-са̄мас gieverie), пукэ тоа̄йва кӯсс вай суэгкь соҋтма мӯрэсьт лыһкма.[2]
Мӯрэсьт лыһкма па̄ҋк э̄л цоа̄гчешь пӯдзэ тӯльесьт лыһкма мембрана. Куэммдас мембрана лӣпенҍ кырьйнэшь югкеналшэм тӣтэгуэйм, кӯгк вуэзхэлленҍ ӣммьлетҍ я ӣӈкэтҍ, пӯдзэтҍ, коанҍтэтҍ, ноа̄вьтэтҍ я мудта жыватҍ, Пе̄йв, ёгэтҍ, я̄вьрэтҍ, ко̄ввсэтҍ я пэҏтэтҍ, соа̄метҍ я сӣн е̄ллем на̄ль я я̄ллмуж, я е̄ннэ мудта па̄ҋҋкэ. Евлий кӯһт эфт-налшэм кырьйнэз;[3] югке куэммдас хозенҍ ӣджь воа̄лэшьт тӣтэтҍ я сӣн сэетҍ.
Куэмдас та̄гкэм гуэйкэ о̄ннъювв надта ве̄джьра (таввьса̄мас bállin) T- вай Y-налшэм фо̄рманҍ, пукэ тоа̄йва пӯдзэ чуэрьвэсьт лыһкма я кырьйнэзэнҍ хе̄ббра. Ве̄дьжра вӯе ныдтҍшэ о̄ххтэ ӣджьнэсь гу нуэййтэмка̄ввьн о̄ннъюввэ.[2]
Кӯдтъя куэммдас
[edit | edit source]Куэссь выгкъювэ туарр вӯсьт са̄мь о̄ллмэ оасска, надта 17-18 агенҍ ва̄ймэль соа̄метҍ рысстлаһтӭм па̄ль байя, е̄ннэ куэммдсэдтӭ ля̄йй пуэллтма вай ӣжесь хозьнэнҍ а̄нҍса. Тӣдҍнаһтӭм куэммдсэ числа поабпэһтҍ ча̄стнэ коллекцъятҍ. Мӣн пӣйвэ райя пынньювэ 70–80 куэммдсэдтӭ, а̄рркъенне ев 300 ыгке вуаммса. Пугк сӣнэнҍ ле̄в вуэррьял Са̄мье̄ммьне пе̄лесьт вуаннчма – Та̄ре̄ммьнесьт, Рӯһце̄ммьнесьт вай Ке̄ммь па̄ҋкэсьт Ла̄дтҍе̄ммьнесьт. Е̄нмусс куэммдсэ коллекцъя вуайй Таввял музеесьт (рӯцас Nordiska museet) Стогкхольмэсьт уйнсэ.
Ню̄ӆч
[edit | edit source]
Ра̄м-налшэм куэммдас ка̄ввь
Ра̄м-налшэм куэммдас маӈӈь па̄ҋҋк хе̄брэгуэйм
Ю̄лев са̄мь на̄пь-налшэм куэммдас ка̄ввь
Ю̄лев са̄мь на̄пь-налшэм куэммдас маӈӈь па̄ҋҋк
Ка̄йв
[edit | edit source]- ↑ T. I. Itkonen (1958). Koltan- ja kuolanlapin sanakirja [Колтта- я куэлнэгк са̄мь са̄ннҍнэһкь]
, Helsinki: Suomalais-Ugrilainen Seura, 2011, лысст 165 (ла̄ннҍт кӣлэсьт, ерманскэ кӣлэсьт) - 1 2 Соловьёв И. В. Саамские бубны в этнической истории (классификация, генезис и функционирование в традиции)
// Временник Зубовского института. — СПб., 2020. — № 2 (29). — С. 98—117.
- ↑ Mebius H. Bissie, studier i samisk religionshistoria (рӯһц кӣлэсьт). — Östersund: Jengel förlag, 2007. — 247 p. — ISBN 91-88672-05-0.
Кыррьйтӯй
[edit | edit source]- Kjellström R., Rydving H. Den samiska trumman (рӯһц кӣлэсьт). — Nordiska museet, 1988. — ISBN 91-7108-289-1.
- Manker E. Die Lappische Zaubertrommel. Eine ethnologische Monographie (ерманскэ кӣлэсьт). — Stockholm.
- Manker E. Die Trommel als Denkmal materieller Kultur (ерманскэ кӣлэсьт). — Thule förlag, 1938. — 888 S. — (Acta Lapponica, I).
- Manker E. Die Trommel als Urkunde geistigen Lebens (ерманскэ кӣлэсьт). — Gebers förlag, 1950. — 447 S. — (Acta Lapponica, VI).
Уж
[edit | edit source] | Кӣһче фа̄йлэтҍ Викируэкэсьт (Wikimedia Commons) |
- Type, origin and location of all surviving Sámi drums (эӈгельскэ кӣлэсьт) – пугк кӯдтъя куэммдсэ на̄ль, шэ̄ннтмуж я пыннем сай
- Лапландский шаманизм и символика лапландского шаманского бубна