Wp/shi/Lyunardu da Vintci

From Wikimedia Incubator
< Wp‎ | shiWp > shi > Lyunardu da Vintci
2017-fr.wp-orange-source.svg
Amgrad ad icqqa ad t tfhmt !
amgrad-ad gis kra n iwalwn nna ur iẓḍaṛ ad tn ifhm yan iɣ ur issinn ɣ umawal iẓlin n tutlayt taclḥiyt tatrart.
Mad igan afssay ? Fad ad tfhmt mad gis illan tzḍart ad tawst i yixf nnk s umawal lli illan ɣ izddar akkʷ n tasna. Iɣ t ur tufit, tzḍart ad nn taggʷt ɣ imawaln d isgzawaln.
Lyunardu da vintci
Francesco Melzi - Portrait of Leonardo.png
Lyunardu da vintci

Tudert-nns
Azmz n tlalit : 15 abril1452
Aḍɣar n tlalit : 15 avril 1452 Vinci (Toscane)
Azmz n tmttant : 2 may 1519 (immut f 67 n usggas)
Asmutteg
Iger n usmutteg: Tasengama, Tusnakt
Tasdawit neɣ tinmel: Tasddawit n Fluranṣa
Tawwuri
Asengam (فيزيائي), Usnak(رياضياتي), Ajyyar (Aṛṣṣam), Asertan, Aflsuf
Asgmḍ
Signature de Léonard de Vinci.svg
Idlisen
La Joconde, La Cène, L’Homme de Vitruve, ...



Leonardo di ser Piero da Vinci ( 14/15 abril 1452 - 2 mayyu 1519), ittyawssan s Leonardo da Vinci, ikka-t-nn iga yan ugtusnak aṭalyani iddren ɣ tleslalit, iruran taynit dar kigan n yigran zun d unuɣ, taklut, "sculpture", tasedga, tussna, aẓawan, tusnakt, tajenyurit, tasekla, "anatomie", tusnakalt, tasnallunt, tasnemɣit, "paléontologie", d "cartographie". Ikka-t-nn Leonardo ar ittiri ad yisin akkʷ mad illan f ugama, ad yisin manka s teswuri ku taɣawsa, ikka-t-nn iḥrec bahra ɣ tiɣri, "designing" d usgadda n kraygatt asekkin.

Ar ttannayen kigan n mdden Leonardo mas iga yan zeɣ yimeklawen akkʷ mqqurnin ɣ umezruy, wiyyaḍ ar t-ttannayen zund umayaf-nnsen akkʷ. Tenna fell-as tanmezruyt n tẓuri Helen Gardner mas d ur jju izri mad t-irwasen, acku ikka-t-inn ar iggar taynit-nnes s ugudi n tɣawsiwin zund is ur ili anelli-nnes iwetta. Ar tizi-ad nit ur ta jju nessen yat f manka s tt-inn tekka "caractère"-nnes.

Ilul-d ɣ ammas n Vinci, yat tiɣremt imeẓẓin illan tama n Flurinsa ɣ Ṭṭalyan. Ittuselɣem f ufus n "sculptor" d umekla Andrea del Verrocchio afad ad imɣur ayg anaẓur, izzri tudert-nnes s umata-nnes, ar gi-s iswuri dar kra n yiristuqraṭiyen iṭalyanen bahra bɣernin. Ɣ yiseggʷasen-nnes ggʷuranin, idder ɣ yat tgemmi ifulkin nna as-ifka ugellid n Fṛansa.

Ar tettyawḥasabent snat ɣ tugniwin-nnes f tugniwin akkʷ dar mi illa waddur ɣ umaḍal, ad tent-igan d Mona Lisa d The last supper (Imensi ameggaru), isker ula agudi n wunuɣen, yan bahra gi-sen ittyawssanen zund Vitruvian Man (Argaz Awvitruv). Ɣ umata n tikkal, ikka-t-inn Leonardo ar bedda iswingim ɣ yisnulfuten imaynutnin, ilin bedda di-s kra n walugen ɣ ittzemmam akkʷ unuɣen d tektiyin-nnes, amata ɣ yisnulfuten-nnes ur ten jju sul ismed. Rad gi-sen naf kra n tektiyin zun d "hélicoptère", "tank", tamsiḍent, "parachute", aṛubu, atilifun, tiẓri n tneflit d "énergie solaire".

Tudert-nnes

Timẓi-nnes, 1452-1466

Unuɣ akkʷ iqburen dar Leonardo f uyenna ittwassnen, Asif n Arnu, 1473. Illa ɣ usefser n Uffizi.

Ilul Leonardo ɣ 15 abril 1452, ɣ tiɣremt tatuskanit n Vinci, ɣ yiɣzer n wasif Arnu, yura jeddis Antonio da Vinci ifruriten n tlalit-nnes acku ur ta tahlen imarawen-nnes ɣakud-ann, iga iwwi-s n Ser Piero da Vinci, yan umsentam awflurintin bahra ibeɣren, d Caterina, yat tmazzalt nna f ggudin iwenniten d teẓriyin, illa mad fell-as ittinin mas tt-nn tekka tga yat tesmegt d-ikkan beṛṛa n tmazirt-nnsen, zun d Ccinwa neɣ d Anẓul-Agmuḍan, yili daɣ mayd ittinin mas tt-nn tekka ur tgi abla yat tmeẓluḍt ult tmazirt-nnsen nit. D Leonardo, Iɣʷi-t-nn sul dars babas ikellef sis, tiwel daɣ yemmas turu semmus wazzanen yaḍnin. Isem nnes ummid igat "Leonardo di ser Piero da Vinci", isnumken "Leonardo, iwwis n mass Pier u Vinci".

Izzri Leonardo semmus ɣ yiseggʷasen-nnes imezwura d yemmas ɣ yat tgemmi mm wurti, fad ilemma immuti s Vinci ad izdeɣ d ibbas d temɣart-nnes tis-snat Albiera, ilin di-sen ula id jeddis d ɛemmis Francesco. Ḍart mad imeqqur Leonardo, ur bahra izemmim f temẓi-nnes abla yan sin yikettayen ẓlinin, amezwaru lliɣ t-nn-ikka iẓẓel yan wass beṛṛa ujguggel-nnes, yuyel nnig-as yan ugḍiḍ ixatren isli-t s rric-nnes ɣ udem-nnes. Akettay-nnes azalan wis-sin igat; lliɣ t-nn-ikka ar issara yan udrar yaf-nn yan ifri, d mqqar t-nn ikka iksuḍ ad yili kra n xxu ɣ ugens, ur t-tujji tdewwayt-nnes ad ser-s ikcim ad gi-s isnubbec.

Tasawert n Verrocchio, 1466-1476

Ɣ 1466, lliɣ t-nn-tekka dar Leonardo 14 useggʷas, yiwi-t-nn babas dar Flurinsa, afad ad ig anelmad n unaẓur Verrocchio.

Tekka-tt-nn tga Flurinsa yan udɣar ismectagen ul n yan umeẓyan innurzen ad yaɣul d anaẓur, ddren gi-s yad kigan n inaẓuren ttyawssanin ɣ temrawant n 1200 zun d Cimabue d Giotto, ɣinna dar ibeṛṛem yan ixef-nnes qad nn gi-s yaf ifarsen iẓuranen ẓilnin ttyawssanin, ha takatidralit takeswatt s talqubbet-nnes tamaynut igan tabarawt, ha taglizt n ugʷrram John s tiggura-nnes n wureɣ sfiqqisnint, tili ɣ tama-nnes yat teglizt-yaḍen mi ssutulen wattayen-nnes "sculptures" d-kkanin "sculpteurs" akkʷ ttyawssannin zun d aselmad n Leonardo s yixef-nnes.

Anaẓur igan aleḥyan ɣakud-ann iga-t wa d yufan kra n umassaɣ i tfelwin-nnes, yan lli rad tent dar-s yawi s tugt-nnsent. Tawja akkʷ ibeɣren ɣ Flurinsa n uzemz-ann Medici ad tt-igan, nettni ad dar ikka ubergemmi akkʷ ifejjijen ammas n temdint-ann, d iɛezza dar-sen ad ssaɣen tifelwin, isefrisen d tɣawsiwin yaḍnin ẓilnin, kkan-t-nn awed ar bahra ttraran taynit s tsekla d tfelsuft, kigan d inaẓuren iɛerrimen ɣakud-ann; kkan ar ttnuruzen ad si-sen raren ayt Medici d yimeddukkal-nnsen taynit.

Tezri dar Verrocchio yat tsawert imeqquren ur isalan, ɣ ikka Leonardo ar ittelmad tiɣarasin n tẓuri, ɣik-ann ma f t-nn fell-as ikka iga ccil ad ilmed unuɣ, taklut, "sculpture" d umsudem. Mac ɣ wakud igan yan, ilmed daɣ kraygatt tasugert tunfiɛt illan, zun d takrura, tagemɣuzt, tagebbaṣt, tawuri n yilmawen, tamikanikt d tnesramt.

Ur d Leonardo i waḍu-nnes ka ɣinn ikkan ɣ tsawert-ann, amunen gi-s agudi n yimeklawen-yaḍnin, yili akkʷ gi-sen mad yaɣulen d "célèbre" imeqquren, zun d Ghirlandaio, Perugino d Botticelli. Inaẓuren-ad, ur bahra ugren Leonardo s yiseggʷasen. Ar ittales Giorgio Vasari yat tenfust ilan azal f tizi-ad ɣ tudert n Leonardo, ɣ t-nn-ikka Verrocchio ar ikellu yat tfelwit ixatren iqqnen s wudum (baptême) n umasiḥ, ifka-as i Leonardo tmehla n ad iklu yan ɣ yineglusen illan f uẓelmaḍ-nnes. Inna Vasari mas t-nn ikʷla Leonardo s yat tmamekt imk-ad ifulkin, isres-nn akkʷ Verrocchio ccita-nnes s yat tikkelt, d ur jju d nettan ad sul iklu kra ɣ tudert-nnes. S yan uzzray ineɣden, rad ifrek yan i mas d Leonardo ad ixedmen ula igezzumen-ann-nnes yaḍnin, zun d izṛan, amzaz aqehwi d ula "background-nnes". Ar ttinin ula f Leonardo mas d fell-as isnulfa Verrocchio ɣakud-ann asefris-nnes awbrunẓ n David isker gi-s zund tmudemt-nnes.

Baḍaḍ n umajus, (1481) ɣ usefser n Uffizi

Ɣ 1472 zun d ɣik-ann, lliɣ t-nn dar-s tekka 20 useggʷas, ilkem-d Leonardo "Guild" n St Luke (Luke Agʷrram), yat tmaddast n yinaẓuren d yiḍukturen n tesnijjit, d mqqar as-d-isersel ibba-s yat tsawert igan tinnes i yixef-nnes, iɣama-nn Leonardo dar Verrocchio izdeɣ dars acku tɛezza dars twwuri ɣinna.

Tawuri akkʷ iqburen dar Leonardo f uyenna ittyawssanen iga-t unuɣ n wasif Arnu ittyawskaren s uɣanib, ittuzemmem s usakud n 5 ɣuct 1473, yili ɣila ɣ usefser n Uffinzi.

Tudert-nnes tazzulant, 1476-1499

Adday ittara Vasari f Leonardo, ar issemras kra n yiwaliwen zun d "noble", amafkay, "gracieux" d ufalkay, ar aɣ ittini Vasari mas t-nn-ikka Leonardo ɣ tiɛɛurma-nnes, iga yan urgaz iɣezzifen ifulkin, ikka-t-nn idus kigan igeḍḍer, ar akkʷ issefraɣ tisaliwin n yisan s yifassen-nnes qqurnin. Iẓil bahra umesli-nnes ar si-s "charmer" wanna as ka isellan, isiggel kraygatt yan tiddukkla-nnes ɣakud-ann. Ikka-t-nn iga yan umeccimɣan dar ɛezzan imudar, ar issaɣ kra tikkal igḍaḍ afad ad ten ka isderfi.

Ikka-t-nn Leonardo iga yan unaẓur ilan yat tmefkit imqqurn, isnulfa-d ɣ 1482 yat "lyre" n uẓref (nnqert) f talɣa n yixef n wayyis, tizi ɣ t-nn-ikka yan unebbaḍ amaynu ɣ temdint n Milan agafa n Ṭṭalyan, igan s yisem Ludovico il Moro, yan uduk isennuɣjufen inebbaḍen yaḍnin. Yuzen Lorenzo n ayt Medici Leonardo s Milan zund umesqad-nnes afad ad ifek i Ludovico Lyre-ann-nnes zund yat trezzift zeɣ dars. Yura Leonardo i uduk n Milan yat tebratt, ɣ ittales kullu tiɣawsiwin-ann ḥrecnin unfiɛnin nna mi izḍar, zun d asnulfu n tmacinin n girra. Yara-as ula s uzegzel mas "issen i teklut ula nettat", ur t-nn akkʷ ikki ɣ ugayyu-nnes ɣakud-ann mas d taɣawsa-ad nit s rad bahra sul ittyawssan. Iɣama-nn Leonardo ɣ Milan ar iswuri dar uduk ger iseggʷasen n 1482 d 1499, ikka dars yan ugezzum ɣ twwuri-nnes iẓlin ɣar s "design" n "défilés" n tfugliwin d ikaṛnabalen, ttyafan dars ula ɣ walugen-nnes kra n wunuɣen i tmelsa n tmezgunin, idsen yimsegdalen "incroyable" d kra n yisinaryuten nna mi yallfus ad ilin assaɣ d umezgun.

Tazrawt n Leonardo da Vinci s tneqqiḍt n uẓref i Ayyis, c. 1488

Leonardo, zun d nettan zun d amata n yinaẓuren bahra ttyawssannin ɣ uzemz-nnes, kkan-t-nn dar-s idsen yimazzalen ɣ tsawert-nnes, swa inelmaden iɛerrimen swa imawasen meqqurnin, ikka-t-nn yan ɣ yinelmaden-nnes iga s yisem Gian Giacomo Caprotti da Oren. Ikka-t-nn iga yan urba iɣudan iṭṭafen "curls" n wureɣ ɣezzifnin fulkinin. Ikka-t-inn ar di-s ittacka ad ig tamudemt n yineglusen dar yinaẓuren. Mac iga ula yan uxendallas iceqqan, "Salai" neɣ "Salaino" (isnumken "iblis imeẓẓin") ka ad as-ittini Leonardo.

Yura Leonardo ɣ walug-nnes f Salai, mas t-nn-ikka iga yan uṭemmaɛ d yan bu tkerkas ur ilin anaw, d mas t-nn-ikka ar as bedda ittaker tiɣawsiwin-nnes ɣ tgemmi, idder di-s ɣ ammas n uzedduɣ-nnes i 30 yiseggʷasen zund unelmad d umazzal-nnes.

Ayyis Axatar

Afares n Leonardo akkʷ ilan azal ɣakud-ann ɣ uzemz n uswuri dar Ludovico, iga-t asnulfu n yan usefris imqquren f talɣa n yan umnay issudan ayyis-nnes, ad si-s ssimɣuren s unebbaḍ-nnsen izwaren Francesco Sforza. Izwur-d Leonardo s wayyis, deffir mad bahra isker tezrawin-nnss f "anatomie" n wanaw-a ɣ yimudar, issuneɣ-asen id "design"; isnulfa-d yan wayyis n tallaɣt imqquren mi iga s yisem "Gran Cavallo" (Ayyis Axatar), ikka-t-nn rad as sul ittuga ubrunẓ-nnes afad ad yaɣul ayyis awbrunẓ akkʷ ixatren ɣ umezruy atrar. Mac ur as sul tettusmid twwuri-nnes s temgeṛẓa. Ɣ 1494, ifka Ludovico abrunẓ-ann akkʷ dar-sen illan ad t-nn-ssurrin s "cannons" acku fell-asen d-ikcem userdas afṛansis s uwettas n usdurriy. Ayyis n tallaɣt ixatren, ibidd ukan tizi-ann ɣ rad d-urrin ifransisen s Milan ɣ 1499 afad ad daɣ armen ad tt-sdurriyen, smersen-t tikkelt-ad i usleɣmu n tniyyact, xlun-t kullu.

Tamgudt n Isulilen

Tazrawt s tneqqiḍt n uẓref i umedruz (design ittwajjen), c. 1490

Izzri Leonardo snat tseqqimin n teklut nna mi dar illa wazal ɣ wakud ɣ t-nn-ikka ar iswuri dar Ludovico. Yat gi-sent; ad iklu yat tfelwit n uzatim (zzit) nna rad iddun s useɣres axatar n tegʷmat n usemmeḍren iɣusen (Confraternity of the immaculate conception), isker gi-s Leonardo snat tfelwin ifel-d yat d yimhiwac n Milan, yiwi di-s ṭayya s Franṣa, tɣama-nn. Ad tettyafa ɣassa ɣ usalay n Louvre. Ur mzarayent tfelwin ad s yisem, ar mmalant s sin-itsent amuɣli n Maryam Tamgudt d bijju-nnes Ɛisa, ɣ ammas n yan udɣar ameḍlus igan kullu isulilen,َ mani ɣ rad mmaggaren d John Amseddam. Tella yat tenfust (nna ur illin ɣ Injil, tili ɣar ɣ taysi tawmasiḥt) f manik as imlala Ɛisa bijju d John ɣ uɣaras ittawin s Misṛa. Ɣ tmuɣli-a, illa John ar ittẓalla; yall-d Ɛisa bijju afus-nnes ibarek-t. Tettyawssan tfelwit-ad n Leonardo s unezwi-ann-nnes ikerrmen nna aɣ-takka, asidd-nnes aɣrib ikkaten s yan usyafa ittawin tiysas, imula-nnes dranin d "background"-nnes immalan agelmam d yidurar ɣ ammas n taggut. Ur jjun akkʷ tettyawskar kra n tfelwit igan zun d nettat ɣ kullu mayd izrin.

Tamgudt n Isulilen, Louvre, yallfus is d 1505–1508.

Imensi Ameggaru

Tafelwit tis-snat n Leonardo ɣ Milan nna mi dar illa wazal, is akkʷ tettyawssan uggar n tiyyaḍ. Nettat ad igan s yisem Imensi Ameggaru (the Last Supper), ar temmala imensi akkʷ igguran dar Ɛisa s tamunt n yimeḥḍaren-nnes dat wammaẓ d menɣiwt-nnes. Ista Leonardo ad iklu imir-ann ɣ ittini Ɛisa "rad iyi gi-wen iɣḍer kra n yan", ar ittales Leonardo addad n ubhaḍ d unnuɣjef nna d-iɣʷin yineḍfaren-nnes s simraw, ar t-ittales s uɣaras n yimuggan d wudmawen n mdden ɣ ammas n tfelwit. Idsen ar sawalen, idsen bidden, idsen ar ttalen ɣ yifassen-nnsen s tiwdi.

Ikka-t-nn uneggal Matteo Bandello ar iẓerra Leonardo ɣ ammas n twuri-nnes. Yura fell-as mas d ar izzray mennaw n wussan; ar ka ikellu akkʷ mad ila wass s bla n tiremt, ibidd daɣ ilemma kṛaḍ neɣ d kkuẓ n wussan-yaḍnin bla gi-sen iklu wala isker yat, kra n tikkal; ar ka ɣinn ittṣemmar mnid n tfelwin-nnes ar gi-sen ittqezzaz. Inna Vasari mas as-ɣʷlin idammen i umɣar n teɣzamt tamhawcant, itter-as ad isneɣmes Leonardo s mas as-d-iqqan ad iswurri s timmri. Inna Vasari mas t-nn-ikka Leonardo ittecṭen akkʷ, acku ur inni d yixef-nnes is rad nit iẓḍar ad isgadda udem n Ɛisa mezyan, inna-as i uduk mas yallfus is rad isker ɣ wudem n umɣar n yimhiwac tamudemt-nnes i Judas ameɣdar.

"Imensi Ameggaru" (1498). Milan, Italy.

Deffir mad tesmed twuri n tfelwit, nnan fell-as kullu willi tt-ẓranin s umata-nnsen mas d tawuri-nnes tamayuft akkʷ ayenna.

Maca ur as yad issemres Leonardo i tfelwit-ann "fresco" as-d-yusan, isker-as "tempera" iggi n gissu (gesso), nna ur aɣ ittusemrasen yad-lli i tfelwin n uɣrab. ɣik-ann ma f as-ittca tɣurdin-nnes txemmej kullu, terwi s yat tikkelt ḍart yat tmiḍi yiseggʷasen. Mqqar d-iḍer uklu n kra ɣ idɣaren-nnes zeɣ uɣrab, tekka-t-inn tfelwit-ann tettyawssan kigan, ancet-ann lli gi-s ittusiggzen-ittusneɣlen yuger kullu tifelwin tisegdanin n umaḍal.

Tudert-nnes tazzulant, 1499-1513

Ɣ 1499, seḍren Ludovico il Moro. Immuti Leonardo zeɣ Milan d umazzal-nnes Salai d umeddakkl-nnes amusnak Luca Pacioli s Vinisya. Iswuri ɣinna Leonardo zund kran umasgad d ujenyur aserdasan. Acku tga Vinisya yat temdint ibidden f kigan n tegzirin, yurem Leonardo ad iswingim ɣ itsent tɣarasin ma s fell-as ittegdal azzaɣen n iɣerruba. Ɣ 1500, yurri-d Leonardo s Flurinsa s tamunt n yimazzalen d yinelmaden-nnes. Fkan-as imhiwac n teɣzamt "Holy Annunciation" yat taddart d yat tsawert imeqquren.

Tamgudt d urba d tgʷrramt Anne d ugʷrram John Amseddam (c. 1499–1500)—Asefser Anamur, London

Tamgudt d urba d Anne Tagʷrramt d John Amseddam

Ibda Leonardo tawuri f yat tfelwit yaḍen, ig-nn yan uɣawas ɣ yixef-nnes issuneɣ-as yat tunuɣt imeqquren; immalan Mayram Tamgudt, tsekkus f ufud n yemmas Anne Tagʷrramt tusi di-s abijju-nnes Ɛisa, yili f ufasi-nnes John Amseddam (Baptist). Inna Vasari mas tsebheḍ tunuɣt-ann tafalkayt akkʷ midden, ddan-d ad tt-annin irgazen d tmeṭṭutin, imeẓyiyn wala wid meqqurnin s tigrummawin, ad tinid is d kra n umuggar imqquren a s d-uckan. Ar tettyafa ɣila tunuɣt-ad ɣ Usefser Anamur, London. Mqqar d bahra teqbur tezzef, tili ammas n yat tmeṣriyt illasen, da ttekkan midden kraygatt ass asefser-nnes afad ad ka skubbren mind-nnes. Zun d nettat zun d mennawt g twuriwin n Leonardo, ur as jju ismed tafelwit-nnes.

Imenɣi n Anghiari

tad tga tunɣilt i tfelwit n Leonardo igan s yisem" Imenɣi n Anghiari" nna tt-nn-ikkan ittuxlan, iga-as aɣrab addal ɣ wattayen n 1560; yallfus is tga tunɣilt-ad aɣawas i tfelwit

Ɣ 1502 d 1503, iswuri Leonardo dar Cesare Borgia, aristuqraṭ idusen iwwi-s n ubaba Alexander wis-sḍis. Ikka-t-nn Leonardo ar di-s ittmuddu zund kran umasgad d ujenyur aserdasan, ar ttekkan mennaw idɣaren ugens n Ṭṭalyan. Tigiriwin n 1503, yurri-d Leonardo s Flurinsa, ilkem-d "Guild" n Luke Agʷrram i tikkelt-yaḍen.

Tettufka-as yat tmeskirt bahra istawhemman zeɣ dar useqqim (Signoria) n Flurinsa, ran-t ad asen-iklu yan zeɣ sin "frescos"-ann mqqurnin nna rad ilin ɣ ammas n yiɣerban n tmeṣriyt akkʷ dar mi illa wazal ɣ ubergemmi n useqqim-nna, ittukellaf Michelangelo s teklut n Imenɣi n Cascina, ikellef Leonardo s tin Imenɣi n Anghiari. Issenta Leonard ɣ usenfar-nnes, isker tezrawin-nnes f udmawen n yirgazen rfanin d yiysan-nnsen mmaɣnin, issuneɣ-ten, ilin ukan sul unuɣen-a ar ɣilad ɣ walugen-nnes. Mac s temgeṛẓa, rad daɣ ig uya yan "failure" zeɣ dar Leonardo, acku lliɣ nn-ikʷla tugna-ann ɣ uɣrab, ɣ udɣar n ad issemres "fresco", ismerkes-as ikʷlan-nnes d uzatim (zzit), ɣik-ann ma-f as-ggammin ad zwun. Lliɣ yurem ad ten-issreɣ s imikk n wafa, tefsi-as tfelwit kullu-tt. Issuneɣ Peter Paul yat tunɣilt i ugezzum-nnes anammas, awin-as-d ayt useqqim n teɣremt ḍart yat tizi ma rad as daɣ yalsen ɣ uɣrab. Ur ikemmel Michelangelo tafelwit-nnes ula netta acku as-iɣra ubaba s Ruma.

Mona Lisa

Mona Lisa neɣ d La Gioconda (1503–1519)—Louvre, Bariz, Fṛansa

Ɣ wattayen n 1503, ibda Leonardo ar ikellu tafelwit n yat tmɣart ittyawssanen s Mona Lisa, tasefrist akkʷ nna mi dar illa waddur nger kullu tifelwin yaḍnin. Mennaw yiseggʷasen ad gi-s izzri, tga yat tugna imeẓẓin ittwaklun s uzatim (zzit) iggi n yan yifil n ukccuḍ. Ar temmala udem, tafegga tanafellant d yifassen n yat tmɣart ilsan zund ku ass. Ɣ tsefrisin, ar yad-lli tlessa tamɣart timelsa d tzuzaf-nnes timayufnin. Tles ɣid Mona Lisa yat tqendurt iḍlan d yan waddal aseggan afella yixef-nnes. Ɣ umata n tikkal, ar ittajja Leonardo ɣ tfelwin-nnes kra n yizumal ma's yakka kra n tmula (indices) f umdan nna gi-sen ittilin. Ayenn igan aɣrib ɣ tugna ya d uyenna igan aɣbalu i yisem nna s tettyawssan iga-t uzmummeg-nnes : Mona Lisa Giaconda, ar tesnamek Giaconda "tanna itteṣṣan", (tga Mona azegzel n Madonna isnumken "Lalla-nu".)

Tamentilt n max aylliɣ bahra tettyawssan tfelwit-ad, iga-t acku tektur s yidrigen, ar nn-ttaggʷan allen n Mona Lisa s yinigi-nnes, mac ur inni ta yan ad d-ildi ayenn issaran ixef-nnes. Allen-nnes d ula imi-nnes, ar ttumanen zund is aɣ zmummugen, tamsalt igan tamaynut ɣ teklut n tsefrisin, acku ar gi-s yad-lli ttumanen midden s umata-nnsen gan "sérieux". Iceqqa ad yakez yan tinfaliyin n wudem n Mona Lisa s usenɣed, acku iɣ yad ira yan ad iɣer isyafaten n wayya yakez-ten, iqqan-t-id ad nn-iluḥ asmaqqel-nnes s usga n tɣemriwin n wallen d yimawen-nnsen. Ixdem-tt Leonardo s yat tɣarast ɣ tettumanen imula fessusnin ɣ tseggiwin n udem, ameggerḍ d yifassen-nnes, ar tettusemma tamamekt-a "sfumato" (isnumken "aggu" s taṭalyanit). Ḍart mad tt-ẓran kra n yinaẓuren-yaḍnin, nnan d yiguyya-nnsen mas d ur rad zḍaren i teklut n kra n tfelwit igan zun d nettat.

Tudert-nnes tazzulant, 1506-1516

Ɣ 1506, yurri-d Leonardo s Milan d yinelmaden-nnes, idder ɣ tgemmi-nnes ɣ ammas n Porta Orientale. Aɣulen idsen ɣ yinelmaden-nnes d imeklawen : Bernardino Luini, Giovanni Antonio Boltraffio d Marco D'Oggione. Isker D'Oggione mennawt tunɣilin i Imensi Ameggaru, isker Luini yat i Tamgudt n Isulilen, ikʷla Boltraffio d wiyyaḍ kigan n tugniwin n id Madonna d Ubijju, izḍar yan ad tent sul iẓer ɣ yisefsar n tẓuri d ula tiglizin.

Tiɣbula :