Wp/shi/Iḥaḥan

From Wikimedia Incubator
< Wp‎ | shiWp > shi > Iḥaḥan
Takarḍa n tmazirt n Iḥaḥan

Gan Iḥaḥan (s tifinaɣ: ⵉⵃⴰⵃⴰⵏ, s tɛrabt: حاحا Ḥaḥa) yat tamunt n tiqbilin timaziɣin. Gan iclḥiyn, ar sawaln taclḥit. Kcmn ɣ ma mu nttini Sus Mqqurn, illa wakal n iḥaḥan ɣ idrarn n waṭlas mqqurn utrim gr Taṣṣurt d Ugadir.[1]

Aẓur d imikk n umzruy

Iɣ rad nsawl f laṣl nɣ d aẓur n Iḥaḥan, d max aylliɣ asn ttinin assaɣ ad, iqqan d ad nurri tiɣrdin ad nsnubbc ɣ ttarix nɣ d amzruy n Lmɣrib. Ar ttinin id buwmzruy blli iɣ nurri mani ittaẓn i kraḍ id walf usggʷas tiɣrdin, akal n Lmɣrib ɣ akud ann kkan t inn gis tugt n trubba n tqbilin timaziɣin, ɣ tasga n iffus gis tirubba n tqbilin ganin s wassaɣ Ṣnhaja , Amma ɣ tasga n iẓẓlmḍ gis tirubba n tqbilin lli mu ttinin Znata, iɣ d nucka s tasga n tuẓẓumt ar gis nttafa tirubba n tiqbilin n Maṣmuḍa. Iḥaḥan gan zzɣ tirubba ad n tqbilin lli mu ttinin Imṣmuḍn, assaɣ ad n Maṣmuḍa nɣ d Imṣmuḍn, xtalfn gis id buwmzruy ɣ unamk nns, zund Ibn Xaldun ar ittini mas d gan zzɣ tarwa n Maṣmuḍ u Yuns u Baṛbaṛ. Amma uslmad Ɛli Ṣadqi Azayku nttan ar ittini mas d taguri ad n Maṣmuḍa iga laṣl nns tutlayt taclḥit d ar t ittfasar ar ittini mas d tga kraḍt tguriwin Amẓ d Ẓu d Amud, iɣ nsmun tiguriwin ad ɣ yat twinst ar ttggant Amẓẓumud, mayad ar immal ula mas tlla yat tazdayt mqqurn gr middn n tqbilin ad d tiyrza d wakal, ar tzzigiz tguri ad zzɣ imaziɣn aylliɣ tlkm iɛrabn lli as sbudlnin askkil n yaẓ gn gis yaṣ. Zund ɣiklli kullu illa unuḥyu gr ṣṣalat lli igan taẓallit d ṣṣawm lli igan uẓum.

Ama laṣl n tguri n Iḥaḥan iɣ d nucka ad nn sis naggʷ ɣ tsga n ɣaylli sa ttinin middn nɣ d rriwayat ccafahya, ar nn nttafa mas d kra iga t yan d ma s ar ittini iga laṣl nns, illa mad ittinin blli assaɣ ad ur d imzdaɣ n tqbilin ad a mu t ttinin, ar t ttinin i wakal lli ɣ zdaɣn d walli illan ɣ wadlli illan ɣ luḍa lli d iwalan i tsga n iggi n yill nɣ lbḥr, yili mad ittinin blli smman asn assaɣ ad acku mmaɣn bdda tqbilin d ingrastsnt, middn yaḍnin ar ttinin blli ikka d wassaɣ ad aḥwac nnsn lli ɣ gis ggutn iṣɛyiḍn, yili ula mad ittinin blli Iḥaḥan kkan t inn zikk umẓn ar asif n Dṛɛa, ikcm gisn ula Sus d ar sawaln s uskkil n yaḥ zund s umdya nniḥ, skrḥ, mayad kullu lli nbdr iga ɣir aylli illan ɣ rriwayat ccafahya lli ttinin middn iqburn. Mac iɣ d nuḍa ad nẓṛ ɣaylli zmmimn id buwmzruy zund uslmad mqqurn Mḥnnd Ayt Lḥajj ma inna d ma yura f mayad, ar nnin ttafa blli tamazirt ad lli illan zzɣ Usfi ar Agadir yan uzmz ɣ izmaz ikka t inn ɣinn iga ɣir luḍa ur gis izdaɣ bnadm, gis ɣir argan d uzmmur d uccfud, ar d itffuɣ ukabar zzɣ Usfi ar Ugadir nɣ d zzɣ Ugadir s Usfi ar asn mdin iqṭṭaɛn ɣ taganin ad, mayan ad yujjan middn ad ttackan, lliɣ lkmn inɣmisn yan ugllid n ɣ akud ann lli illan ɣ Mrrakc, iggʷiz d ilmma s ugayyu nns aylliɣ iẓṛa mayan, izri s Sus yawid yan lɛadad n uzufri, inna asn ackad ad awn iniɣ ma tskarm ar awn akkaɣ tiɣraḍ nnun, yiwi tn d ilmma ibḍu tn kulla mraw isrs tn ɣ yan ugguz, isrs mraw ɣ Ayt Amr, mraw ɣ Ida Utɣumma, mraw ɣ Ayt Ɛisi ɣikkan ɣikkan aylliɣ tn kullu ibḍa f tmazirt ad, inna asn ilmma ar tḍufm f iɣarasn d ar tḍufm ingratun, kra iga t ayyur ar nn taqqlaym s Mrrakc ar d ttawim lmunt nnun, izri mad izrin, iɣli daɣ ugllid ad s Sus yawid gis yan lɛadad lli igan tfraḍin s smmus tad n tfunast d tɣyult i yan, yackid ar asn yaṭṭu mayan inna asn "Han timɣarin nnun, ha lbhaym nnun, ar tggam tawala i tiḍaf, ar tffrḍm ar tkkrzm tsalam iguyya nnun, ar tḥiyyaḥm ar tmatarm iɣarasn" ɣinn ilmma ad ikka laṣl n iḥaḥan d aẓur n yism ad

Ar zzigizn ilmma tusutin f tusutin, ar d ittimɣur tmazirt ad imikk s imikk aylliɣ tlkm ɣilli tlkm ɣilad

Asnay n tiqbilin

Yat taddagt n wargan ɣ Iḥaḥan

Iqbiln n Iḥaḥan gan tn[2]:

  • Ida Ugrḍ
  • Inknafn
  • Ayt Zlṭn
  • Ida Uzmzn
  • Ida Wisarn
  • Imgrad
  • Ida Gillul
  • Ida Ubuzya
  • Ayt Ɛisi
  • Ida Ukazzu
  • Ida Utɣumma
  • Ayt Amr

Tiwlafin

Logo informations.svg Adr f kran tawlaft fad ast tssimɣurt

Tiɣbula

  1. C. Agabi, « Haha. (Ihahane) », Encyclopédie berbère,‎ 1 uktubr 2000, p. 3326–3328. ISSN 1015-7344, [Ɣr ɣ wantirnit]
  2. M'haned Aït El-Haj, حاحا (Ḥāḥḥā), dans معلمة المغرب (Encyclopédie du Maroc), Tome X (1998), p. 3264.
Nuvola Moroccan flag.svg
Amgrad ad izdin d Lmɣrib iga amud, imẓẓiy ka sul. Aws Wikipidya s usnfl nns d simɣur t.