Wp/shi/Ayt Ṣwab

From Wikimedia Incubator
< Wp‎ | shiWp > shi > Ayt Ṣwab
Taltmsn, yan udwar itabɛa i tqbilt n Isaggn Ayt Ṣwab

Tiqbilin n Ayt Ṣwab gant yan mnnaw n tqbilin tisusiyin munin ddu ism n Tmunt n Tqbilin n Ayt Ṣwab, Tamunt ad tetabɛa ula nttat i Tiqbilin n udrar lli illan ɣ Tmunt n Tqbilin n Wactukn Imqqurn. Ɣ iwtta n tqbilt ad ɣ ugmuḍ ar nttafa taqbilt n Ida Ugniḍif d tqbilt n Ammln, ɣ ugafa ar nttafa taqbilt n Ayt Tidli, ɣ umalu ar nttafa taqbilt n Ayt Ḥmad d taqbilt n Ida Ursmuk, ɣ iffus ar nttafa taqbilt n Ida Usmlal.[1]

Illa ma ittinin mas d Ayt Ṣwab gan aqbil yumyn mnnawt tqbilin. Yili ma issmrasn ism n "macyaxa" (مشيخة) i tqbilin ad igan ɣ Ayt Ṣwab. ism n "fraction" ɣd ntta ittwasmrs lliɣ tt nn kkan Ayt Ṣwab ddu tnbaḍt n Fṛansa.

Iskr yan ufṛansis ism nns Jean Podeur yan udlis s taclḥit d tafransist isman gis imikk n tskla tamiwant n Ayt ṣwab. Adlis ad iga s ism "Textes berbères des Aït Souab (Iḍrisn Imaziɣn n Ayt Ṣwab) "

Tiqbilin n Ayt ṣwab

Asksl n yat tgmmi ɣ Ayt Ṣwab nẓḍar ad gis nttanay idrarn n Waṭlas mẓẓiyn

Tqbilin n Ayt ṣwab gan:

  • Taqbilt n Isaggn
  • Taqbilt n Tudma
  • Taqbilt n Ayt Ɛin
  • Taqbilt n Ayt Wikman
  • Taqbilt n Ayt Yaḥya
  • Taqbilt n Ayt Uɣan
  • Taqbilt n Tiwazwin
  • Taqbilt n Imdiwn
  • Taqbilt n Imkwin
  • Taqbilt n Ayt Baḥman
  • Taqbilt n Inḍrifn

Taskla

Tinfusin

Aclḥiy d waɛrab

Gmern yan ucelḥi d yan waɛrab, amzen yat teskkurt d yan waɣuct. Lliɣ ten-umzen, inna waɛrab-lli ucelhi : « Bḍu yanɣ tagwmert-ad. » Inna yas ucelḥi : « Ssgerfeɣ-ak : ad asiɣ taskkurt, tasit kiyyi waɣcut, neɣd at tasit waɣcut, asiɣ taskkurt, aynna trit. » Ar ittals i wawal-ann, aylliɣ inna-yas waɛrab-lli : «  Ac ka tgul a had leqrufi ? Wellâh, mul had eccettâb a ma neddih ! »

Imiker d bab n tgmmi

Idda yan imiker ikcem s tgmmi n yan urgaz ɣ yid. Ur gis illi ma ittaker abla tumzin. Bab n tegmmi izer-at lliɣ n ikcem s tegmmi. Ifss, ur as-inni yat. Ikks imiker aqccab-nnes, iɛmmer-t s tumzin, isers-t. Iddu ar ittmurruy ɣ tegmmi is ra yaf kra n teɣawsa yâdnin. Bab n tegmmi yusi aqccab n imiker-lli iɛmmer s temzin, iheḍu-t ɣ yan lmakan. Lliɣ d yuḍa imiker ur d yufi yat, yaf d aqccab lli lâh-t. Iddu a iffuɣ ɣ imi. Inna yas d bab n tegmmi : « Iɣ teffuɣt, teqqent imi. » Inna yas imiker : « Skar asn ɣikad, ad akk ur teqqent imi. »

Hggelɣ ak ttin

  1. Tjiyyr ur tli imi : Taglayt
  2. Iɣ idda ag afqir, iɣ d yuda ig aɛzri : Ayddid
  3. Krad krad ar ihahan : Inkan
  4. Ar ttshkuk, tɣli d ignna : Taknarit
  5. Sin ismgan bksn bdda : Agdur t tsksut
  6. Iɣzzif ur ittif asklu : Aɣaras
  7. Turu tn tg tn ɣ wukris : Tissit
  8. Turu tarwa, tg tn ɣ ijjbirn : Ikrmudn
  9. Iɣzzif, tugwrt tzuknnit : Aɣaras
  10. Yussi taskimt, ar izzigiz : Iɣirḍm

Nnan willi zrinin

  1. Wanna iɣran i waḍu ur a yalla i walim.
  2. Wanna iran tinɣdin izzl asnt iḍarn.
  3. Ur ak ikwmz inna k iccan, abla afus nnk.
  4. Wanna iɣwra i ṭṭelba iɣr i sslukt ur a ismummuy s ugwns n tmklit.
  5. Takat ur a ttasi tayyaḍ.
  6. Tamart ur a ttjara i tayyaḍ.
  7. Wanna iran tid mmimnin iṣbr i tid rẓagnin.
  8. Aynna ɣ isbr yan, ifulki gis.
  9. Wanna ur irin a iṣbr, ira yezbr.
  10. Afhim ifhm, aɣyul ifrd alim.

Ilinkn yaḍn

  • Fuṛum ayt ṣwab, yan fuṛum ibdan ɣ 2007 (irwas), ar yadlli git ttmyawaḍn ayt ṣwab, illan ɣ tmazirt wala ɣ bṛṛa nns. ɣilad ur sul bahra gis illi umussu.

Idlisn

  • Yasmin Lbaz, Tiram n Tmazirt - Taqbilt n Ayt Ṣwab
  • Jean Podeur, Textes berbères des Aït Souab (iḍrisn imaziɣn n ayt ṣwab)

Iɣbula

  • Taskla - iwalian dderin n Ayt swab (Alink nns)
  • Taskla - hggelgh ak ttin n Ayt swab (Alink nns)
  • Taskla - Contes n Ayt swab (Alink nns)
  • Jean Podeur, Textes berbères des Aït Souab (iḍrisn imaziɣn n ayt ṣwab)

Isaɣuln

  1. Tiqbilin n Sus : http://www.tribus-de-souss.tk/2008/11/blog-post_4286.html