Wp/ses/Wangu si boori

Wangu m’a sintin, boro si nga kaydogoo bay. Wangoo kaŋ sintin Maali ra wayna hunaa here ga bisa jiiri woy, aduɲɲaa konday beeroo na nga wangiizey kate, amma a mana hin ka ben, kal’i dira, daliloo ir kul g’a bay. Wangoo mana fay a ga nor hal’a koy Mowti laamaa ra, a duu gaabi nungoo din ra, a filla ka too Segu laamaa kul ra, borey buu, adabbaa boyandi, faarey taasoo kaŋ too hegayyan tonandi. Alwaatoo ra isiney hunday ka duu senday, wangoo koy Sikaaso, Kulikoro, Bamako maanay ra, a goo gurfa Kay laamaa ga, kaŋ ti Maali woynakaŋay benantaa. Kay nda Sikaaso fondoɲaŋey ga dii senday, waani-waani moobiley kaŋ ga karanzoo nda taasoo luudu ka hun teekoo ga. Maaliizey torro, i laazaaba, koyrayaŋ tun, jamaa talka, zankey jaŋ cawyan, hinoo duuraa nakasi, heraa ga borey ceeci. Hõ Maali zaaradaŋkey goo ma kookari hala baanoo ma willi koyraa ra, iberey sintin ma yalaafu. Tammaasa boobo ga cebe kaŋ baanoo ga kaa kayna-kayna nunguyaŋ ra, goyey kaŋ ga too laboo duuraa ma tonton ga tee, lakkalkanaa goo nungu boobo ra. Amma nunguyaŋ da goo no, kaŋyaŋ ra senda ga siita ka tonton. Wangoo benyanoo de ma hin ka hasaraa kayandi.