Wp/ses/Sooni nda Moosey wangoo

Sooni goo gaawo gurma, loobu tenj'a ga goorarey kaa, isaa haroo ma ziji ka koy humburi. Lakkaloo ti harihiyey ma hin ka too humburi, maamalaa ma koy nda jine, baryey kaŋ goo humburi ma si jeŋ burgu, alfaritaraa ma tonton. Gooraraa mooru, I goo fansaroo ra hala alhabar kaa kaŋ moosey na konaari kayri, I na tumbutu kayri, I na boro kaŋ gaaru I se wi, I n’almaanoo ka dira. Sooni na tubal kar, a šarre wangiizey jine, a na moosoo gaaray, a gar moosoo n’almaanoo kul kaŋ a duu a nda wandoo nd’izey naŋ diiray, a na walata daŋ nga jine ka koy alman ceeci. Moosoo mana hansa ka mooru diiray kaŋ sooni too kate nda gurma cine, a deŋ, a na moosoo almanoo nda wandoo nd’izey ka šerre kabara se; moosoo duu alhabar a guma ka yee kate, moosoo kaa ka too sooni wangoo isaa kaboo ga, deŋendi doo ra, moosoo kay a na sooni jamaa honnay, a n'arey guna kaŋ goo bari beerey boŋ, a dii wangu-izey hinnaa; moosoo kuubi ka nga boŋ ceeci, a gar sooni wangu-izey dii a, sooni na gaarandi, I koy too'a deboo; noodin no wangoo tee, wangoo šendi, jamaa buu, moosoo wangu arey buu, cindey maray, boŋkoynoo zuru, I hang’a hala ampir di maali. Garaasey nee sooni s'a ma fay nda, a ga duu a.. Sooni kaa gaawo, a na kanfariyaŋ tunandi kaŋyaŋ koy kate mooro naaba baahunaa wala boŋoo, woodin mo ka tee, I huru cewoo ra ruwayom moosi, I na w'i kate boŋoo. Mayga!