Wp/ses/Senday lakkalkey kondaa

Senday lakkalkey kondaa kaŋ se i ga nee "Komite de kiriizi" (faranse: Comité de crise), goy margaw no kaŋ goro Gaawo tenjoo ra handoo kaŋ s'i ga nee nowambur. Komitewoo muraadoo ti ka sendawey kaŋ bangay karanžoo fondaa ra nda haroo nda kuraŋoo fondaa ra lakkal ka duu i se doonay. Gaawo ga doona senday waani-waani maamala jinawey hayoo fondaa ra, soosiyete siwil, jinay daykey (konsomaterey) kondaa na haya kul tee maamalakey (komersaŋey) ma laasaabu ka hay daŋ kaŋ s'i maray, a si borey maray. Zaabi si duwandi, woo din ra jirbey wey kaŋ ra Maali dii dabari zaaray ka duu ka laboo kankam, ka borey turandi hinoo ga, hinoo ma wurje, boroyaŋ ma kaa kaŋ laboo bajoo nda borey borcinitaraa si biney ra. Woodin ra boroyaŋ tee kaŋ g'alman ceeci nda sendaa, i si kula nda laboo nafaa ka duu ka misoo lakkal. Guwerner, soosiyete siwil, soogey kondaa na konday daŋ kaŋ ti Komiite de kiriizi, karanžoo ma si bisa katibi 180 liitar (900 CFA/l) foo se, a ma bara esitasiyoŋey ra 170 ga, karcewey kaŋ goo nda harijaŋay ma duu faaba. Goyoo goo nga boŋ ga, maamalakey ma boŋdum. Alhaali ra borey faham; i yadda misoo goo cere bande.