Wp/ses/Ofis Niižer

Markala baraažoo tee za annasaarey ga, a tee nda hini, gaabi goy: Maaliize, Burkina waney, Niižer nda koyra boobo borey kaa ka goy baɲɲay-baɲɲay hala baraažoo tee ka ben. Lakkal beeroo kaŋ nd'a tee ti faari goyyan ma hin ka teendi, hegay beeri ma duwandi moo here, alkama, dumariizoo ra sanda albašar nda haya kaŋ ga him'ey, hamiisa ma duwandi nda baayan, hegay beeri kaŋ ga hin ka Maali kul wasa hal'a ma gandawey kaŋ ga Maali kuubi k'a bere wasa, hegaa ma hin ka koy neerandi taray. Hekitar zenbarey no baraažoo haroo g'i haŋandi, baraažoo ga haroo dii bande a ma ziji hala kiloo 200 alkadar hondoo ra, batuma tarantarante beeri goo no kaŋ ga hin ka goyandi. Hegay fellante ga tee amma kaboo mana hin ka jer Gaawo nda woynahunaa ga. Laasaabay ra alhukum hinaa jaŋaa ka siyaasa dirandi kaŋ na taasoo ka koy too Maali nungey ra kaŋ si nda hegay beeri hala hoo hekitar zenberey cindi kaŋ ra goyoo mana hin ka too. Ir ga naata kaŋ ne nd'alwaati goyoo ga tee.