Wp/ses/Maali haabu lanboo

Maali ga tee labu kaŋ ra haabu lanbu ga tee. A ga farandi za jiiri 1970 gandaa ra. Jiiri kul goyoo ga tonton, alfarey na jine tee goyoo se, zama i goo nd'a ra nafaw, Maali goo gandawey ra kaŋ goo nda hegay beeri. Sikaaso arežoŋoo ra goyoo sintin, noodin no iziney kaŋ ga habiizoo kaa jere ga cindi, iziney tonton. Izin tee kaŋ ga habiizoo jiyoo kaa. Habiizoo bande nafaw boobo duwandi: haabu kaaraa ga soolandi ka koy annasaarey labey ra. Faransi, Šin nda koyra taney no ma misoo juwal. Ngey ma haabu lanbu boobaa day, k'a barmay k'a tee darbay henna nda nafawhaya dumi booboyaŋ. Haaboo hayoo sii Maali nda Afiriki dumekey kanbey ra. I ga Maali noo woo kaŋ ga hima. Haaboo goyoo mana fay a ga tonton, arežoŋey ga tonton kaŋ ga haaboo dume, hala Maali ga baa ka tee Afiriki koyra jinaa kaŋ hegaa ga beeri haabu here. Maali ga duu nafaw, alfarey ga duu ng'alkadaroo, baytal almaanoo g'a maate. Adisi, takaa kaŋ nda koyra koyjinantey ga duu haaboo nafaw ka bisa dumekey, Maali nda Afiriki laamawey da ma soobay ka ngey hegaa barmay, k'a tee silli nda zaara kaŋ ra alman besere ka fatta.