Wp/ses/Lotokorey lokkoloo

Hammada Iduwal ga tee lotokor beeri, gaawiize no, Buram koyraa kaŋ ti Daŋa boro no. A caw lotokortaray, a na anniya ka nga boŋ goydogoo feeri. Woo din ra haya banda ga kaŋ a goy laboo kaŋ s'i ga nee Norweži konday beeri ra, Gosi ti Tunbutu laamaa ra, Hamada duu faaba beeri kaŋ too a ma hin ka duu lokkol feeriyan fondaa lotokortaray cawandiyan se. A duu faaba kaŋ nd'a na cawhugey cin, cinari henna, a na cawandikey sool. Hamada ka Gaawo lotokor lokkol jinaa feeri, a bisa jiiri waranka. Jamaa kaŋ caw ka fatt'a ra, kaŋyaŋ duu goy, i ga ngi boŋ alaayaney zaa, boro boobo cewoo yay a cire nd'i ma koy hala Bamako ka caw. Lokkoliizey kaŋ duu kilaasu yaggaa nda wey kaŋyaŋ duu kilaasu woy cindi hinkaa šahadaa no ma koy caw lokkoloo r. I ga bana hala jiiri hinza, itaaci. Lotokor lokkolyaŋ kokor ka feera ka tonton, mise no kaŋ hansa ka baa boro boobo se kaŋ duu šahada kaŋ nd'i ga hin ka duu goy. Fondaa kaŋ Hammada Iduwal Mayag n'a feeri tee albarka daŋyan beeri, kaŋ kala kookariyan, nga cinney ma boobandi Gaawo gandaa nda Maali laamaa kul ra.