Wp/ses/Koroŋ (Korsol)

Koroŋ (korsol) ga tee jiiroo alwaati kaŋ hundikoyni kul g'a maate, a ga tee šenday borey se, azayraa se, adabbawey se, hewoo ga koroŋ, waynaa ga koroŋ ka tonton; a goo jiyaa nda kaydiyaa gamoo ra, koroŋ šendaa se nti azayra kul ma hin ka dumandi, a ma hin ka tonton wala ka huna alwaatoo no kaŋ ra alfarey ga ngi faarey henanandi ka kaydiya batu, borey jerey ga laboo tunandi, bawoo ma hin ka buu, babataa ma buu, lalabawey goyoo ga sintin. Koroŋ ga tee alwaati kaŋ ra konni futaa ga tee wirci borey nd'adabbawey se, boro zeeney nda zankey ga huulate, gaahamey ga kogu, affaa, hima i ma duu yayni doo, i ma cindi ka hari haŋ, saddiŋa goykey ga duu šenday, dumaray-ize kaŋ ga tee ga šendi, wey kaŋ ga baaba kala goy kala almušakka tontoni. Konni futaa ga tee wirci adabbaa se, nga kokoroo kul ti tasa dori. Sorkey si feeri, haroo kacca, a kogu, hamiisa si dira ka boori, kurdogey ga mooru adabbaa se, harijaŋay ga bara hondoo ra, pinaasu koyey nda harihii koyey ga taabi, solo ga bara, koy ka kaaroo kal'a alwaati kuku. Gaawo ra karca boobo si duu ponpi hari, hondoo gorokey kala zargayan.