Wp/ses/Kaydiya

Alwaati no jiiroo ra kaŋ ra alfari, kurkaw sanda adabba koy, sorko kul ga maate nda gomni nda duura, nda, koyjinayan, alwaatoo no kaŋ ra hew yayna ga hẽe ka hun gurma ka koy hawsa, duulawey ga tee i ga bagu, ncirɲoo ga kaŋ, a ga gar alfarey cindey sintin faarey goyoo ra, alfarey jerey goo soolumaa ga, alfarey ga duma, i ga ngi goyey dirandi nda naata beeri, a goo kaydiyaa handey ra, korsoloo, korsoloo ga tee alwaati dumba kaŋ ra, šenday ga bara hunay fondaa ra, taasoo miɲoo ga doona ka ziji, taasu taasoo ga doona ka jaŋ, zama fangarey ben, taasu tejoo mana huru, kala suuri hala hegaa ga sintin nda kaydiyaa boori hunay ga duwandi kaŋ ti taasey, a goo i ra, doonoo, ganšoo, takabaroo, mula-mula, horgaa, molo kaŋyaŋ kul ga tee saajoo ra, hubaa, daara-daara, kakaaroo wey ga duwandi borey g'i ka šendaa bisandi. Adabbaa hunaa ga boori, waa nda jii goo, hamey ga hay, hawjiyey biney ga kan, sorkey duuraa hamiisa here ga tonton. Kaydiya ga hin ka bara nda šenday, a goo sendawey ra, hari kuroo kaŋ hanga goorey bande ka doo isa faarey ra, moowa ga yoole, hugey ga kayri, i ga kaŋ, buuyan ga hin ka tee, adabba buuyan ga tee, zarmey n'a se donga daašoo ga kaŋ milihotto nda jirijiyan banda ga ka hasaraw tee, fondawey ga dumbu, moobiley ga kaŋ, hari hiyey ga mun cindey ga kayri, hundi ga hun. Alwaati no kaŋ boro ma hawgay nda hiri taamaasa goo, a ga boori boro ma lakkal daŋ beena alhabarey se kaŋ hinoo sarwiisoo g'i tee.