Wp/ses/Jiyaw

Jiiroo alwaatoo no kaŋ ra yayni goo, hargu ga tee, a ga koy too hala handu hinza, itaaci. Jiyaw boŋ no moowey hegaa ga sintin Gaawo gandaa ra. Jiyaa ra korsoloo heraa ga ben borey ga, hunaa ga boori ka bisa koroŋ (korsol) nda kaydiya, naarukey ga willi hugay do, koyraa ga huna, hiijawey ga tee cere bande, jooteyan si taasu here, yayni goo, boyrawey ga tee hugey ra, attay ga haya har, koyra hugey ga cina, i ga sorhõ. Woyey ga jiyaw hugey taalam, i m'i dugu. Hondoo borey ga dii hargu ka bisa isaa borey. Handoo ga tee farru kaŋ ra hew yayna ga hansa ka hẽe, kala tuuri funsuyan, caŋkanyan cijinoo kul bande. Adabbaa ga dii šenday, izey ga boobo ga buu, hargu ti addalil, subu ga kogu, hari kaŋ ga haŋ kurdogey ra si faala, waa ga nakasi. Borey iboobaa ga duu konbu dori, hunsar doo wirci kaŋ ga hun yayni ra, daabuyan jaŋaa g'a tee. Jiyaw goo nda hargu kaŋ hin ka hegay koraa ganji teeyan. Boro si hin ka man haroo, sorkey ga dii hargu, i ga hin hargu amma koyoo nda ga takaa, a ga tilasu i ma ngi goyoo tee. Adisi ir ma si hansa ka baa hamiisa ma faala. Jiyaa ra dumaray-izey ga tee ka boori, saddiŋa koyey biney ga kan, hegay ga tee, daymi ga tee ka boori. Jiyaw ra a ga hima borey ma daabu ka boori.