Wp/ses/Hugu hinka

Za ir boro jinawey ga hiijay ra, aru boro ma hugu hinka ga koy, woy boro ma suuri, a ma yadda hugu hinka ga, waccetaray ga bara ir boro bii taray annaamoo ra, waani waani Mali ra. Hugey kaŋ ra wacca goo ga huna ka boori, si dii šenday, zankey ga cere dii ka borey borotaraa gaabandi, woyey ga boŋdum arey se, I ga foomanda ngi ma willi arey dabaroo cire, atabiya woo tee boŋkaanay nd’albarka ir borotaraa ra. Alsilaamataray ka tabatandi kaŋ aru ga hin ka hiiji hala woy taaci kaŋ g’a si bisa aduɲaa too nongu ra kaŋ annasaarey cawoo, araajey, teleewey, interneetoo, aladaboo dira, a say, kaboo mana fay a ga jar ir annaamoo ga, lakkal kaccey lakkaley ga tiswaasa hal’a too nongu kaŋ ga ir woyey nd’iriizey n’I boonay, afooyaŋ ga dii kaŋ ir s’i henna boŋ woo kaŋ I ga dii a teleewey ra, I g’a zente. Woo kate kaŋ šendawey waccataray fondaa ra hansa ka boobo ir koyrawey ra, waafakay jaŋay, hinkosay, cere dabariyaŋ, alhaasiritaray. Handoo kaŋ bisa ra hinne kolokaani nda ɲiyoro laamaa ra, woyyaŋ tee kaŋ na ngi kurɲey wii kaŋ yaŋ nee ngi ma koy hiiji sabbu se.