Wp/ses/Harihii zurandiyan

Harihii zurandiyanoo, cere gaarandiyanoo goy ir labey ra, a ga tee alaada haya kaŋ ra borey ga cere kaanandi, waani waani soogey. A ga boobo kaŋ a ga soolandi ka tee batu beeri jingar hane, a ga tee alaada jingarey wal’a hinowaney, wala boŋkoyni kubayyan se, wala politiki kampaaɲey ra. Nda gaarandiro man, soogey ga tee kuray. Kuray, ceefooyaŋ kuutey dagawey ga faya, daga foo kul nda nga ekipoo, isa boro sorkey mo ga kay ngi boŋ see, dendenyan ga tee jirbi boobo cere bande wala cee boobo cere bande hala jamaa foo kul ma hin ka doona cere, ekipu foo kul ma dii alwaati ra nga sendawey nda nga gazarey k’I hanse ka zaaroo batu. Batoo hane, jamaa ga marga ceesoo ra, jinehuney ga bisimillandi, hiyey kaŋ ga gaarandoo tee nda ekipey ga kaa, batoo soolukey ga ngi goyoo dirandi, tun dogoo ga kuubi ka kaa ka silbandi, nga fahamandoo ga tee ekipey se, hiyey ga kay ka batu, ekipu foo kul nda nga noonaa, ceefooyaŋ nga bankaaraa nga daraapoo. Boro kul ga nga boŋ sifa, hoolaa ga tee kayna haya banda ga kaŋ boraa wala wakkiloo kaŋ boŋoo ra fuulaa goo yahadar, batoo soolukey ga malfa kar, nda malfa sii no I ma sifilaa kar hiyey ma serre, kaydamaa ga laasaabu, jama ga kati, hooraa nda gaanoo ga tee hala hiyey ma kuubi ka kaa, hiyey si fay I ga huru cere jine, cindey ga hun hal’i ma too kaydogoo ra, wey kaŋ zaama kaŋ ti ijinaa, ihinkantoo, ihinzantoo ma bayrandi, binakaanandiyaŋ ma huru borey kaŋ zaama kabey ra, alwaati fooyaŋ ekipey kul ga duu ng’alkadaroo, jinahuney ma boraa kul foo nda goy, I ma cebe kaŋ boraa kul ka zaame, batoo ma felfel nda gaarayan cere se.