Wp/ses/Hamiisaa hasaraa faarey ra

Hamiisa ga tee isaboro hunay beeroo, nga t’ir taasey maafaa, nga jaŋaa ga tee senday beeri, zaman koraa kaŋ hamiisaa duuyanoo nakasi, jamaa kaŋ hunaa gaza, boro boobo duuraa nakasi, waani waani sorkey nda kuuley nda borey kaŋ goo hamiisaa goyey kul ra. Cimi hamiisaa goo nda nafaw kaŋ si fillandi ka ben, amma alfarey kaŋ ti moo faari koyey ga dii senday hamiisaa here; alwaati kaŋ faarey ga haŋ, zaman koraa woo ra, hamiisa ga huru haroo bande moo faarey ra, a ga gar moowaa suboo ga ban, hamiisaa g’a dumbu, haroo ma ber’a boŋ, takoo nda faari boobo ga faraw. Hanoo hane hasara si boobo ka too hõ, alfaritaray goo nd’alkadar, kaadey goo nda himma, lalabawey ga tee ka sawa nda haroo muradoo, jindey ga goy henna, karjoo ga huru nda fondaa, cere gunayan si goy teeroo ra, a ga sendi hamiisaa ma duufondo ka huru alwaati kaŋ ra a hin ka hasaraw tee, zama nda haroo guusu kul hamiisa hasaraa ga kacca; hanoo din nda hamiisa sibil huru faari ra, šeegay n’i g’a zafa, ka boŋey jendaw faaroo jindoo here nda kabey ga. Šeegaa hottoo ga say ka hanga mennaa bande, hamiisaa ga buu wal’a ma mooru faaroo hottaa sabu se. zaman koraa kaŋ r’ir goo, i ga nee hamiisaa safaroo kaŋ ga tee assom laala kaŋ annasaarey g’a tee doowaa nda ciraa se kaŋ ga hegawey nda azeera halaci laboo boŋ, zaman banda ga i dii kaŋ a ga hasaraw tee bunaadamiizey ga, i na nga hansaroo nda nga neerumaa ganji nda šariya. Woo din no boroyaŋ ga somogol k’a tee, k’a neere isafaari koyey se, I g’a ka hamiisaa wii, I ga borey hunaa nakasandi, i goyey kaŋ ga deega sorkotaray ga wii. A gar safari mana bay ka teendi ka hamiisa wii, woo kaŋ ga bara safarey kaŋ teendi doowaa nda haya kaŋ ga himey se nd’a huru haroo ra, hundi koyni kul kaŋ goo haroo ra, a tee ham, kormoto, nooni, gangam ga buuposonaa dori boobo daŋ borey, a ga huru nda boro kuuroo ka kay basoo ra, ka duu birey jiiri kul kaŋ a ziira boro ga, I kaccaa kaŋ ga huru ga cindi a ga fanjaa hala alwaati wala jiiri kaŋ a duu fonda, a ga cahãa ka wiya nd’alkadaroo boobo, a disi ni kaŋ dooga, kaŋ ga goy tana foo tee faaroo, ni kaŋ g’a neere, a ga mun ni kabey ga, ni kaŋ ga doori ni faaroo ra, hekkay ni goo farratay ra, ni goo ma halaci. Ni kaŋ g’a neere bay borey ma bay kaŋ boro wiikaw ti ni woyey war ma yadda ka dooga faari ra kaŋ ra hamiisaa safaroo huru.