Wp/ses/Gaawo obitaloo
Gaawo obitaloo Gaawo, Maali gallu beerey, affoo no. Sarwiisi booboyaŋ goo a ra. A goonda obital kaŋ ga hanse ka boori. Za ho, a mana cindi ka boori. A cindi ka ziibi, cetaa kayri-kayri, ponpey hasara ; jerey ga dandi yaada ; cindey, haroo n'i ŋaa. Hugey jerey miɲey nda funeetarey kul sii nda ganbu. Lotokorey hinnaa si too, goyjinawey mo ga gaza, safarey da kul si duwandi, anbilansoo zen, moobil tana kayante sii no goyey se kaŋ ga hima ka tee. Obital alhaaloo na borey biney kaa hala jerey ga koy safar ɲamay, cindey ga koy Bamako. Hõ zaaroo, ir ga Irkoy saabu ; obital misoo barmay, barmay kaŋ ga boori. Garu taagayaŋ cina a ra kaŋ hinnaa ga too iwoy cindi yaaha wal'i ga bis'a. Garu foo kul goo nda hugu-ize boobo. Obital beeraa se, nkaŋ mana bay ka huru a ra ga dere, nd'a mana duu boro kaŋ g'a ni cebe fondaa.
Gaawo obitaloo kaŋ Šinuwawey n'a cin, fasaloo boori. I na fondoyaŋ tee a ra kaŋ bande moobiley ga dira ka wircikoyney kate wala k'i fattandi. Fonda fooyaŋ mo goo no kaŋ guuru tende goo i boŋ kaŋ cire ceekoyey ga dira waynaa masi duu ey, ncirŋoo masi i kar. Tende fooyaŋ mo goo no borey se kaŋ ga hanga wircikoyney bande. Garey kaŋ goo obital gundoo ra, ay s'i kul goyey bay. Wey kaŋ ay g'i bay alhakiika ra ti : tike diidogoo, obital wakiiley birowoo, wircikoyney diidogoo, operaa hugoo, arajoo dogoo, laboratuwaroo, safarey hugoo, moodori hugoo, wircey safar hugey, hugoo kan ra i ga wircey lawre, hiɲe-kaa-hugoo, woy gundekoyney nda zanka aɲeerukoyney neesa hugoo, bukawey hugoo, marsiney kaŋ ga kuuraŋ noo hugoo, ŋaahayey hina hugoo, salangawey nda ɲumay dogey nda batukaa hugoo.
Nda boro huru obital, haya booboyaŋ ga te ma ne gaayay : -ijinaa ti kuuraŋey, nda kutukuriya henney, nda tuurey kaŋ ga šette-šette, nda fondo serrantey. -ihinkantoo ti windoo nda hugu taagey kaŋ kul tol m'i daabu. -ihinzantoo ti lotokorey bankaarawey kaŋ ga kaaray, i ga henan tas. -itaacantoo ti wircikoyney kaŋ ga kani daarey ga ; jerey ga duray, jerey ga hēe, cindey ga dejje. -igguwantoo ti opera hugoo gundoo jinawey kaŋ ga boro hunburandi. Taabal foo g'a ra kaŋ boŋ i ga borey opere. Taabaloo din, anpul beeri foo goo a tenje beene kaŋ nd'i baa i g a zigandi, nd'i baa mo i g'a zumandi. A ga hin ka kuubi jere kaŋ i baa here. Jinawey cindey, nda lotokor mana i filla boro se kul n'si hin kafaham i se. -idduwantoo ti hiɲe-kaa-hugoo. Nga mo nga jinawey ga hunburandi. šeezi beeri foo goo a ra kaŋ boŋ i ga boro gorandi ka hiɲoo kaa. Anpul beeri goo šeezoo tenje beene kaŋ nda lotokoroo ga boro miɲoo guna. Kanbi dumi-dumiyaŋ nda maasu dumi-dumiyaŋ, nda sana dumi-dumi booboyaŋ goo hine kaakaa jinawey ra. Cindey, kala nkaŋ i n'i fahamandi ma ne. -iyyantoo ti arajoo hugoo kaŋ nda boro huru a ra, a goo nda marsin kaŋ g'i ka dii haya kul kaŋ goo gaaham ra bil'i m'a kottu. -Lotokorey kaŋ ga dori-izey ceeci borey kurey nda ngi harimuney, nda haya tanayaŋ ra, misoo ga kayfandi. Ni mm'i gar luulu-ize booboyaŋ goo jiney ra kaŋ ra hayayaŋ goo. I ga ikayna kaa i ra k'a guna diji fooyaŋ ra kaŋ g'i cebe dori-izey. -Anbilansoo nda bukawey looraa mo goo obital hayey ra kaŋ si hima ka dirrandi zama ngi noonawey nda moobil cindey waney ga fay, ngi heeney mo si hima.
Hõ zaaroo, Gaawo obitaloo goo cinarawey ra kaŋ nda boro ga hin ka binekaanay. Amma ya, hala hõ, a sii nda lotokor hinnaa kaŋ ga hima ka nga goyey kul tee. Hinoo ga hima ka dorkoto garu henney cinaroo masi tee yaada.