Wp/ses/Gaawo-Bamako fondaa

A ga tee fondo kaŋ ga Maali woyna hunay nda woyna kaŋay sogay cere ga, fondoɲaa beeri no kaŋ nafaa si kabu ka ben, alfaritaraa here, maamalaa here, naaruma here fondo no kaŋ nga booro ga tilasu Gaawo se nda Maali kul koyjinaroo se, Maali cinaroo, borey cere diiroo fondaa ra, borey baskasina nda ngi duuraa tontonoo fondaa ra. Fondo no kaŋ nga hunaroo ga Maali taalammey nafa, Alže, Niižer, Burkina hala, Gaana nda Togo kul fondaa albarkaa ga jer i ga. Fondo gaya no, a ma guduroŋ no borey hansa ka yadda nga nafaa ga, a ga too kilo zenber foo, Gaawo ka koy Seewaare ga koy man koy zangu guu kaŋ guduroŋoo mana hasara kaarey ga tun Gaawo subbaahi i ma almaaroo tee Bamako. Hõo gudoroŋoo hasara, aloomuroo ben zama a ga bisa jiiri waranza a ma tee ka kaa hõ, šenday beeri huru naarumaa ra, Gaawo ka duu Seewaare kala jirbi hinza ka too i guu, faraa, taabi, gurzugay ka marga nda bandiwey kaŋ ga borey kom, boro laaley kaŋ ga lantay hiriɲka moobiley ton, ka borey halaci. Irkoy ma kate faaba kaŋ na wongoo benandi lakkal kanay ma kaa, fondaa ma guduroŋ teji hiyey nda borey koy ka williroo ma boori, goyey ma boobo, duura ma yuluwa.