Wp/ses/Gaagaaru

Gaagaaru

Adama-ize ga kay, a ga dira, a ga goro, a ga tun a ga gunguma. Wey kul haya si i faalandi a se kala birey kaŋ ga dobu cere ga. Birey wey goo boro hamoo kul ra, i ga sogay cere ga nongu fooyaŋ ra, affooyaŋ ra i ga kotay cere ga wala i ma kosay cere ga. Biri dumi hinza bara boro gaahamoo ra : biri dunba kaŋ goo kabe ize nda jinde ra ; biri kuku kaŋ ti soronbu nda maka biri nda biri tefay sanda tetefe.

Waati kul kaŋ zanka ga tonton, birey ga kuu, i ga beeri, i ga yakuwa. Boro zankataraa ga, ni birey ga ban, i si kuu, i si warga. Hala boro beeri, kala ni birey ma sendi jiriŋ, i ma kuu ni hamoo bande, i ma filla ka warga. Saa din biri ga tonton baro hamoo nda ni azzatoo bande. Biri kaŋ gay wineegar wala asidi ra, sendiyanoo kul ga hun a ra, a ma tee ibaana foo zama wineegaroo g'a ŋaa. Ciirey nda calsiyomey kaŋ goo biri ra no m'a sendandi. Nda biri huru nune ra, a ga dii hal'a ma kaaray ;a ga don fellaw ; nga kayriroo ga faala, ma nee dooru zama nunaa na nga albarkaa kaŋ ti oseyinoo ŋaa. Hala boro na ham ŋaa k'a kaa biri bii ga, ma biri baanaa kaama, ma londoo zuu. Ir ga hima ka lakkal tee zama nd'ir ga hooray wala nd'ir kaŋ, birey ga hin ka kayri. Kayriyanoo ga hanse ka hottu, a ga boro maray. Hala nongu kayri, i g'a haw za boraa mana koy lotokor. Lotokor hugoo do, nongoo kaŋ kayri, i ga palaatar dam a ga, a ma dobu. Koyra kanbey ra, boroyaŋ goo no kaŋ ga kayri safar jirbi iyye banda ga.

Zanka kayri ga tar ka dobu ka bisa borobeeri wane. Zanka birey ga hanse ka ban. Nda nga diraa wala nga goraa mana boori za ganda ga, woo ga kate birey ma gongoli. Woo se ir ga dii zankayaŋ ga gawsu, affooyaŋ ga gum, cindey ga siiri. A ga hima teelataakey nda janbudamkey nda lokkol-izey... ma haya bay ngi boŋ se ngi goyey ra, birey masi gongoli. Ir ga hima ka gaabandi guuri nda azayra fita nda tuuri-ize nda waa ma bara zankey hunaa ra.