Wp/ses/Delbuyan

Waatoo kan ay goo nda jiiri woy cindi hinza, ay ga honga jiyaw zaari foo. Ay nee ay cere fooyaŋ se ir ma koy delbu isaa ga. Kan ay n'a har i se kul i yadda. Ir na ir delbey soolu, ir na ŋandey soolu, ir na hayey mo k'ir g'i ŋaa nd'ir heray isaa ga, ir n'i ka koy ir bande. Waatoo kan ir too isaa ga, ir n'ir darbawey kaa, ir n'ir delbey hanse, ir n'i cetaw haroo ra, ir sintin ka delbu. Za subbaahi kan ir sintin ir ga delbu, ir n'adduhaa kul tee, hala a ga hima nda zaaroo ga baa ka kay, ir mana duu ba hamiisa foo. Nandi kul kan ir na dan delbey miney ga, ir n'i warra agay nd'ay cerey, kul hamiisawey mm'i naa. Delboo ga fatta nda koonu. Woo din da ra ir hoy hala waati foo, ay n'ay delboo warra haroo ra. Ay ga batu. Ay ga batu da kan ay maata kan haya foo goo ma delboo cendi-cendi. Ya mma nee kala delboo nka dii a. Ay n'ay delboo cendi k'a kaa haroo ra jaka ay mana duu hamiisa. Amma delboo koy, a kotay ay ceroo cewoo ga. A huru ay ceroo cewoo ra.