Wp/ses/Danbanguyan

Danbanguyan ga tee alaada goy ir laboo ra, a ga šendi kabila kaŋ s'a tee, ir soŋay taray g'a tee ariizey hinne se, woyey s'a ra.A ga tee zank'aru marayyan jinaa, a goro nda gaabi, a dii nga hugoo boraa, a dii mo kaŋ dumbakey kaŋ kone siinoo goo ga too nga doo, misa kaŋ g'a kayfandi. Koyraa ra a ga tee nda boobo jemda ra, waati kaŋ haroo ga huru, gandaa si hansa ka koroŋ, i ga karciyaa wala koyraa zankey kaŋ yaŋ goo nda jiiri guu ka koy jiiri yaaha marga nongu foo ka ngi jofolawey dunbu, i g'i dii nd'affoo foo,g'i dunbu jereyga hẽem jere si hẽe, dunbaroo ga tee isaa miɲoo ga, ir ma nee haroo miɲoo ga, nkaŋ dunba kul, i g'a gorondi haroo ra, a ga cawey serre haroo ra, nda dunbaroo ben, i g'i kaa haroo ra, ka denjibibi hamni daŋ gooru dogoo ga, i ga koy hugey doo, hugu folokaa ra, i ga boro beeri tee kaŋ g'i laakal, borey ga hin ka cere barmay barmay kala zankey ma duu baani, i ga koy nd'affoo fo. Jirbey kaŋ zankey g'a tee ngi huna ga boori, i ga ham nda jii ŋaa, woo ti safari beeroo, wey kaŋ biney ga daaba, i g'i gaabi nda ŋaayan. Jirbay kaŋ koy, jirbiyaŋ i g'i gorandi haro ra hala guurudogey ma hiiji i m'i ɲimay, i ma tenji, i ma darbay dan i ga. Zanka kaŋ mana hẽe dunbaroo ra, ga hegu nd'a binakaanandi sanda hancin wala feeji hala haw, a goo ngi borey hinaa bande.