Wp/ses/Caa teekey

Ngi ti borey kaŋ doo nda ngi takaroo, i ga bibi, biiroo si kan i se, waani waani woyey kaŋ ga bibi, i ga bii kaŋ arey si baa kala woy kaaray ka bisa woy bibi. A gar adamayzey ga ti kabila kabila, jerey ga bibi, jerey ga kaaray, cindey ga ciray, affooyaŋ ga kara, bobo kul ni noonaa ga hima ka beeri ni ga, irkoy ka borey kul kaa haawa nda adama ga, bisa caraa si hima ka tee woo, lakkal kaccaa kate boro fooyaŋ ga ceeci ka kaaray, i ga ngi kuurey yan nda jiiyaŋ kaŋ iziney g’i tee, i ga soso ka ngi boŋ yon, i ga žawel hari ziiri. Amma laasaabay ra borey i booba kaŋ ga goyoo woo tee ga hin ka neray alwaati dunba ngi kokoroo ti i ga tee hesu hayayaŋ, kuurey ga todda, i ga hunburandi, hewey ga tiŋ. A disi borey ma fay nda kuuru kaarandiyan, poroodiwoo ga kate wirci boobo, a ga too kuuru ma mon a ma ban, a ma jaŋ ka ti jejebu dori se, boro kaŋ na nga kuuroo mon nda poroodi si hin ka opeere nd’a wirci, caakoyey kaŋ ga misoo hasara ga haw nda ngi ma goro borey ra, i si hinka koy batey ra, i ɲimsi, affooyaŋ ga ngi baahayey gagay, i ma si tee ngi cinne. Nooru hasaraw no.