Wp/ses/Boŋfeeray

Soŋay sennoo cawoo nda nga hantumoo no ma bayrandi nda boŋfeeray. A ga too jiiri 40 wal’a ma bisa kaŋ senni boobo kaŋ ga selaŋandi Maali ra ga hantumandi, tiirayaŋ ga wallafand’i ra. Maali caw hugu ministeroo ga hansa ka durkutu woo fondaa ra, porožewey cindi ka faaba beeri tee alfarey ma caw, ka bayray sanbu ngi goyey fondaa ra. Bayraykoyney cebe kaŋ senni ga tee haya kaŋ ga huna, a ga tonton a ga nakaši nd’a si hantumandi, woo se ir ga hima ka kookari soŋay sennoo ma koy nda jine, a ma bayrandi anduɲaa senney ra kaŋ ga gaabi, a ga bara internetoo hayey kul ra. A goo hayey ra kaŋ ga zanka lakkaloo feeri, a ma dii sigira ɲaŋoo sennoo ra hal’a ga too lokkol huruyan. Kaba goyey here nda alfaritaray, gaaham baani nda fatawci here a ga boori boro ma wan hantum nda cawyan ka duu ka hin ka bayray tonton, duuraa ma tonton, nafaa ma yulwaa, laboo ma koy nda jine. A ga hima hantumey kaŋ ga tee palaakey ga, bitijey miɲey ga nda jiirawey ra k’alwaatey cebe ma tee nda soŋay hantumoo abaca nda fondaa. Hanoo din I ga n’a se boro beerey cawoo zama boro beerey mana hin ka caw lokkol nda taalibitaray hõo fahami duwandi kaŋ senney cawoo ga hansa ka baa ir borobiitaray gandawey koyjineyanoo fondaa ra. Adis’ir ma lakkal beeri daŋ ir sennoo cawoo se.