Wp/ses/Baŋa

Baŋa ga tee adabba kaŋ ga huna isaa ra, a ga diiyandi isaa ra, ir Maali ra za lagine forontiyeeroo ga hala labzanga. Isaborey g’a bay, a goo ir sorkey nd’ir hookey hoohayey ra. Baŋa ga boobo a ga hasaraw tee hiikoyey se nda sorkey nda faarikoyey se, a ga doona ka hasaraw tee adabba koyey se; a ga bari kar k’a wii, a ga feeji taama batakaraa ra k’a wii, a ga haw wii haroo ra nda guraa ga. Baŋa goo hoogawey ra kaŋ wiiyanoo ga gagayandi Maali ašariyaa ra, kala nd’adalil keyanta, a goo daliley ra baŋa kaŋ na boro wii wal’a ga faarey hasara wal’a ga sorkey dorandi nda haya kaŋ ga hima wey, waati din no hinoo goydogoo kaŋ ga huuga nda saajoo nda haroo ga fonda noo hookow kaŋ goo nda fonda se a ma baŋaa wii. Baŋa ga tee taka haya beeri kayroo: meetir 1,30 ka koy meetir 1,60 kuuyanoo: meetir 3,20 ka koy meetir 3,50; tiŋaa: kilo 1500 ka koy kilo 3,200; alhamitaraa : jirbi 225 ka koy jirbi 257 ize foo n’a ga hay gunda foo kul ga, a ga šendi a ma ntaway; iza taana tiŋaa ga too kilo 35 hayyanoo ga. Baŋa aloomuroo ga too jiiri 25 ka koy 45 nd’a si kaba ra, nd’a goo kabara a ga hin ka too jiiri woygu, hiɲa 32 bar’a se, hal’a baŋa too hayyan a ma moora baŋa kuroo, a ga h ay nongu kaŋ si guusa ra. Daliloo kaŋ se a ga moora baŋawey cindey ti izoo ga hin ka t’aru baŋa arey ga wii, baŋa si hay kala nongu kaŋ si guusaa ra, gurawey maanay ra nda nongu kaŋ ra menay si, nd’a hay, nda bininoo baa a se, a ga izoo tuti nongu guusaa here. Baŋiize ga zii hayroo banda ga ɲaŋoo g’a tuku, a ga koy, a ga kaa k’a naanandi.