Wp/ses/Arubeeri masi doona ka gaaru zanka se

Arubeeri kaŋ mana fay nda a ga gaaru zankey se, han foo ga tee kaŋ i ga moo kayandi a ga. Alaada ra, aduɲɲaa kul ra, zanka ga hima ka borobeeri beerandi. Amma woo fondaa ra, zanka mo goo nda alhaku borobeeri ga. Wa haŋa tee deedaa woo se. Ir koyraa ra, Nayno ti arubeeri foo kaŋ ga hanse ka doo nda zamanoo zankey. A nee tafatuyaŋ no; i sii nda bine, i mana tee asaja, hewhunoyaŋ no. Woo ra, adduha foo, Nayno ga bisa, a dii soogayaŋ kaŋ ga cankan hugu foo jeroo ga. Nayna nee i se ngi soogotaraa ga, ba jiyaw ciray ngi si cankan, ngi ga ɲumay waati kul. A gar kaŋ bangu foo goo koyraa cire. Bangoo din haroo ga hanse ka yay, waaniwaani bangoo koroo. Kaŋ Nayno na sennoo har kul tubaa nee a se nd'a doo ka miri bangoo ra kul nga g'a noo feeji foo. Moo miti k'a daabu ga, Nayno hun darbay. A zunga bangoo haroo ra. A miri hal'a too haroo karoo do. Nd'a nka bay, a si a filla. Batakaraa kaŋ goo bangoo koroo ra se, haroo ga yay hal'a g'a hima nda galaasi. Kaŋ Nayno too bangoo koroo do, yayni foo n'a kubay kaŋ n'a ka gofi dogoo ra. Nayno zollo ka tun, moŋey ga buttu boŋoo ra, niisey ga doo. A haaba ka guraa wiri. A ga jijiri karkar, hal'a si hin ka kay cewey ga. A zuru ka too nunaa do. Haya kayna ka ganji a ma huu a ra. Ba senni mong'a se, a lutu, a benbaw. Nayno duu feejoo, amma a ba ka jaŋ hundoo. Za han din no koyraa zankey duu a ra baani.