Wp/ses/Alman kuryan

Alman kuryan ga baa soola nda wangaaritaray. Alman sorhaa nda nga booroo sii kala gana ka zumbu dogey bande,.Alman kuryan alwaati beeroo ti zaaroo, zama zaaroo r'i ga koy kur nongur mooro ra. Almaaney kur dogey ti hondey nda saajey. Ngey haŋ dogey ti bangey nda goorey, wal'i ma kaa ka haŋ isaa ga. Nda hari sii hondoo ra, jamda waate i g' almaney doori isaa ga hal' i ma duu ka loog' i ma yaynay. Woo ga t' i se hinfa kaŋ g' i naasandi, alman kurkaa ga hin ka kubay nda šenday booboyan. Woo se kala ma tee wangaari kaŋ ga wakkal nd' Irkoy, kurkaa ga hin ka kubay nda zay nga nd'a ma tangam wala ma zay kurkaa se ka gar kurkaa mana bay. Kurkaa ga hin ka wirci kur dogoo ra, a ga hin ka buu kur dogoo ra, a ga hin ka dere kur dogoo ra, a ga hin ka jirb'almaaney m'a naŋ, wal' almaaney ma dere sõy, wala hoogawey ma huru almaney ra. Haya kaŋ buu, haya kaŋ dere, haya kaŋ hin ka yee hugey do. Kurkaa soolumawey kuryanoo se ti (hari nda ŋaayan). Alman nd'a ga kungu a ga jaaje za alaasar hugey do, nd'a ga heray nga jaajayanoo si faala, nd'a ga kungu a si tun nga dirgaa ra hala moobooroo ga, alman nd'a si kungu a ga hanna ka tun ka koy kur, wala boro hunday ma hanna ka koy a taarandi. Nmma, kurkaw kala ma tee lakkalkoyni, waani-waani woo kaŋ hanna ka koy taarandi kal'a ma nga goboo zaa ba zaari no soko cijin here, zama a ga hin ka kubay nda ganjihayey nda cerkey hunday, wala zay, alman ba boro s' a may ni boŋ se nda nga kur, nga duu a ra nafaw kaŋ koyoo si duu a a ra. Alman nafawey kaŋ kurkaa ga duu ey ga boobo, a ga duu nga waawaa, a duu nga jiiyoo.