Wp/ses/Alhazi Umar Almahadi Mayga

Alhazi Alfa Umar Mayga, i ga nee a se Alfaa Umar, ti Forgo-ize kaŋ cindi nda goray Gaawo saatoo. Boro no kaŋ na nga cawoo iboobaa tee Makka ra. Hanoo kaŋ a ben, a willi ka kaa nga koyraa ra, kaŋ ti Maali-Gaawo. Za kaŋ a kaa, nga huzumoo kul ti nga ma hin ka Gaawo kuubi ka beraa kul faaba nd'alsilaamataray addiinaa. A sintin ka waazu Gaawo gundoo ra nda koyra kanbey ra. Woodin r'a goo hala Makka nda Kuweyt borey na jiiray beeri feeri Gaawo setiyem karce (Soosookoyra), i na jiiraa maaɲoo daŋ Kuweyt, i na Alhazi Alfaa Umar Mayga tee a se allimam nda nga cerey kaŋyan ti: Alfaa Isa, Alfaa Usman Sala, Alfaa Ismayla, Alfaa Ismayl Zayni. Alfagaa waazey na boro booboyaŋ ka willi ka tee alsilaamataray ga, iboobo na goy laala fooyaŋ naŋ. A goo woo da ra hala hinoo n'a noo fondo a ma ciiti dunbu borey nda cere game kaŋ ti alsilaamataray ciitoo. Gaawo kuubi ka beraa kul waafaku nda nga ciitey, i yadda nga bayraa ga, i bay kaŋ Alkuurana hakiikaa nda a ga goy bila nda hundi ibaayi, bila nda borotaray, bila nd'alman. Alfagaa na Gaawoo dii cere ga nda waafakay hala dumey kul ma huna cere bande bila cere fay-fayyan, bila wangay wala wangu. A too nungu ra kaŋ ba nda soogey baa ng'i ma haya fooyan tee, nd'a ni ma si a tee, i ga naŋ, i ga yee ganda. Woo ra a goo hala hinoo n'a noo meeday beeri nda sahada booboyaŋ. Alhazi Alfaa Umar mana fara nda nga goyoo hala jiiri zenber hinka nda waranka cindi taacaa, kaŋ Irkoy na nga talfoo taa. Irkoy ma hinn'a g'a ma yaafa! Alhazi Alfa Umar Mayga hala alfagey gamey ra.