Wp/ses/Alaada boŋkoyney jingaroo

Boŋkoyni taray goo nda sorho, hunayan henna si hin ka duwandi borey nda cere game kaŋ mana ti nda juwalyan. Boŋ no ma dabari, a ga gonga ba adabbawey goo nda boŋ, hawey si kaŋ isaa ra ka zii kaŋ mana ti haw boŋoo ka doo. Boŋkoyni goo nd'alkadar, borey kul si hin ka tee boŋkoyni, a ga hima borey k'ir n'i bay boŋkoyni, ir m'i beerandi, ir ma yadda ngi dabarey se, ir m'i faaba ngi goyey ra, woo t’ir boŋkaanaa, a t’ir se baani nda lakkalkanay. Alaadaa nee ir ma boŋkoyni beerandi; ba de a ga tee habasa baɲɲa nga beerandoo ra boŋkaanaa g'ir se, boŋkoyni, kaynandiyan si tee boŋkaanay laboo se. Woo din ra Maali ra koyra boŋkoyni goo nd'alkadar beeri, haya si nga koyraa kal’a ma hinagoo tee k'a hansa. Boŋkoyni goo nda sorhõ, alkadar beeri kaŋ Maali hini teejey n'a tabatandi ka tonton, hinoo nda šilbay tee boŋkoyni foo kul se kaŋ ga deega a ga, a ga tee alaada boŋkoyni sanda alkaydi, kabila boŋkoyni, a ga tee fargandi boŋkoyni, a ga tee koyra boŋkoyni, hinoo na zaari kayandi jiiroo ra kaŋ ti nowambur jirbi woy cindi faa (11.11) k'a tee jingar Maali kul ra, zaari no kaŋ ra alwakkiltaray ga cere kubay, hinoo borey ga yahadar, jamaa ga kaa, ka zaaroo sorhandi nda cere honnandiyan, yaamaryaŋ hala boro kul ma lakkal daŋ amaanaa se kaŋ goo boŋkoyni nda jamaa nda cere game, boŋkoyney ma lakkal daŋ talkey se, borey se, alhakey se. Haraŋ jiiroo jingaroo tee Gaawo guwernoora batu hugu beeroo ra, borey kaa goyoo dira nda misa henna, kal'ir duu alumur kaŋ m'ir cebe yeesi wanoo.