Wp/ses/A nin-a-nin

Hooray no kaŋ ga tee soŋay laboo ra, soŋayizey ga boobo k’a tee. Zankey ma tee kuray hinka; i ga nongu foo kayandi hari. Kuray faa ga kay cewey ga, kuray faa ga gangama. Wey kaŋ ga gangama ga jine tee haroo se, wey kaŋ ga kay ga bandafur haroo se. Zankey kaŋ ga kay, ga ceeci ka gangamkey gamey kottu ka bisa, wal’i m’i kar boŋey ra ka zuru.

Hala kaykaw foo hin ka gangamakey gamey kottu bila nd'i ma cee k’a kar, a ga nee « Baali kottu ». Kaykey kul ga zuru ka haroo wiri, gangamakey ga zuru k’i ceeci. Hala kaykey kul hin ka too haroo ga, kul i duu hari foo, amma hala gangamakey duu i ra boro foo, kaykey ma gangama, gangamakey ma kay. hala kaykaw foo na gangamakaw foo taaru boŋoo ra, a mma nee « A nin ».

Kaykey ga zuru ka haroo gaarandi, gangamakey ga zuru ka dii i ra. Waati kaŋ gangamkaw foo na cee ka kaykaw foo kar, a ma nee « sap »; gangamakey kul ga kay cewey ga. Kaykey ga ceeci ka ngi affoo dii, a ma si tun. Hala kuray foo ra boro hinka na cee ka kara, wal’i na boŋ taaru, wal’i ma baali kottu cere bande, kuru kaŋ n’a tee ton, hooraa ma sintin koyne. Kuray foo kul ga nga harey kabu hala hooraa ga ben.