Jump to content

Wp/sas/Merariq

From Wikimedia Incubator
< Wp | sas
Wp > sas > Merariq

Merariq niki salah sekéq budaye kawin pelai dalem tradisi ato adat Suku Sasaq. [1] Pelaksanaan merariq niki bedoé empat prinsip: kebanggaan nine, keberdayaan mame lan kendéqberdayaan nine, kebersamaan, kance keuntungan ékonomi. [2] Merariq bedoé makne, yaitu ketabahan, keseriusan, tanggung jawab, lan keteguhan siq ngewujudan merariq kance penyelesaian perkare kadu musyawarah. [3] [4]

Pelaksanaan

[edit | edit source]

Sendéqman akad

[edit | edit source]

Dalem pelaksanaanen, tradisi merariq niki bedoé beberapa rangkaian kegiatan. [5] Biasen, tradisi niki teawalan siq midang, pas calon semame dateng juq dengan toaqn calon senine, jari semacem pinangan siq pihak mame. Trus, arai melaiqang, pas nine niki tepelaiq. Léq tradisi laéq, nine nike teseboq léq balén saudara ato léq kepala lingkungan. [6] Laguq, praktikn, nine nike langsung teseboq ato langsung tejauq juq balen mame nike. [6] Lamun nike jari kasusn, ni sampun jari kegiatan haq tearanen mangan perangkat. [5]

Seembih nike, telakukan bésejati, pas pihak mame nike persiapan diqn ato ape-ape doang haq harus tesiapan adén bau merariq. Pas persiapan niki, araq beberapa langkah haq harus telakukan, misaln béng naon pemerintah setempat, maraq selabar. [5] Pas selabar nike, pihak mame béng naon kepala désa (pengamong krame) pihak nine, trus telanjutan juq kepala dusun kance kepala lingkungan (pengembang krame). Lamun araq masalah, masalah nike teseleséan siq musyawarah siq pihak bianen mame kance nine. Lamun ndéq araq mupakat sembihn musyawarah nike, masalah nike teseleséan siq kepala désa. [7] Laguq, lamun wah araq mupakatn, pihak mame nike mulai bait wali, yaitu pasn éndéng wali léq pihak nine adén nikahan kedua calon semame-senine nike. Pas wah nike, baun tepiaq akad.

Seembih akad

[edit | edit source]

Seembihn akad nikah wah telaksanaan, araq maliq beberapa rangkaian kegiatan haq harusn tejalanan éndah, misaln bait janji. Dalem bait janji niki, araq utusan pihak nine haq berunding jumlah pisuke, jumlah aji krama ato denda, kance tempat lan tanggal begawéan. [5] [8] Utusan pihak nine niki harus bedoé beberapa syarat, yaitu: [8]

  • wruhing kotare, ato paham awik-awik lan adat;
  • wruhing tatakrama lan bersusila, ato paham awik-awik tata krama lan étika;
  • padang wacana, ato pasih ngeraos;
  • apik nasiti ngawicara, ato teliti dalem ngeraos; lan
  • haja wong kamaruk, ndéqn dengan kemaruk.

Lamun ndéqn araq masalah, proses nikah ato merariq niki baun telanjutan. Prosesi niki teawalin siq prosési sorong serah, yaitu nyerahan anak siq dengan toaqn masing-masing adén nie bau berumah tangga lan ndéq terikat sepenuhnya siq masing-masing dengan toaq. Dalem sorong serah niki, araq beberapa bagian haq tejauq, yaitu: [9]

  • otak bebeli ato besirah;
  • képéng siq jari simbol kesiapan irup (tapek lemeh);
  • kain siq jari simbol kesiapan berumah tangga;
  • simbol pengasuh lan perawatan (saling dede);
  • simbol pengamanan lan satya kesatria (penjaruman);
  • denda haq harus tebayah lamun ngeléngkak kakakn (pelengkak);
  • tadung pengaret;
  • pembahas kuta;
  • penebus keluarga (kor jiwa);
  • denda lain haq harus tebayah (dedosan); lan
  • képéng keputusan lan persaksian (pemegat)

Seembih nike, baru bau telakukan nyongkolan, prosés nganter semame juq balén senine nike. Dalem acara niki, semame niki tearak lampaq kance teiringan musik tradisional maraq Gendang Beléq. Acara niki telakukan jari bentuk pemberitahuan siq araq semame kance senine haq barusan jari juq masyarakat sekitar. Seembih nike, baun éndah tepiaq prosés-prosés lain, maraq begawe ato pésta pernikahan lan napak tilas ato silaturahmi keluarga. [5]

Rujukan

[edit | edit source]

Catetan naén

[edit | edit source]
  1. ↑ Saladin 2013, p. 23-24.
  2. ↑ Saladin 2013, p. 26-27.
  3. ↑ Anggraeny 2017, p. 51.
  4. ↑ Rosdiana, Arman & Multazam 2018, p. 167.
  5. 1 2 3 4 5 Sari 2022, p. 17.
  6. 1 2 Rosdiana, Arman & Multazam 2018, p. 169.
  7. ↑ Anggraeny 2017, p. 46.
  8. 1 2 Sari 2022, p. 33.
  9. ↑ Sari 2022, p. 34.

Daptar bacean

[edit | edit source]
  • Anggraeny, Baiq Desy (2017). "Perkawinan Adat Merarik: Kajian Budaya Hukum Masyarakat Suku Sasak". De Jure: Jurnal Hukum dan Syari'ah. 9 (1): 43–52. doi:10.18860/j-fsh.v9i1.4375. ISSN 2528-1658.{{cite journal}}: CS1 maint: url-status (link)
  • Aniq, Ahmad Fathan (8 November 2012). "Konflik Peran Gender pada Tradisi Merarik di Pulau Lombok" (PDF). Conference Proceeding: Annual International Conference on Islamic Studies (AICIS XII): 2321–2339.{{cite journal}}: CS1 maint: url-status (link)
  • Kholidi, Ahmad Khaerul; Faizun, Adi; Iqbal, Lalu Muhammad; Ramdhani, Ahmad (2021-09-06). "Makna Tradisi Marariq Masyarakat Bangsawan Suku Sasak Di Lombok". Palita: Journal of Social Religion Research. 6 (2): 99–116. Retrieved 2026-02-13.
  • Rosdiana; Arman; Multazam, Andi Muh. (2018-07-25). "Praktik Merariq pada Masyarakat Sasak di Kecamatan Gerung Kabupaten Lombok Barat". Window of Health : Jurnal Kesehatan. 1 (3). doi:10.33096/woh.v1i3.691.
  • Saladin, Bustami (2013). "Tradisi Merari' Suku Sasak di Lombok dalam Perspektif Hukum Islam". Al-Ihkam. 8 (1): 21–39. ISSN 2442-3084. Archived from the original on 2019-04-29. Retrieved 2020-09-10.
  • Sari, Baiq Alvia (2022). Prosesi Adat Merarik Masyarakat Bangsawan dan Jajar Karang di Desa Marong Kecamatan Praya Timur Kabupaten Lombok Tengah Tahun 2020/2021 (PDF) (Thesis). Mataram: Universitas Islam Negeri Mataram. Retrieved 2026-02-13.

Retrieved from "https://incubator.wikimedia.org/w/index.php?title=Wp/sas/Merariq&oldid=7011655"