ことぅばー文化やんでぃぬくとぅやん。ただ、思とーるくとぅ伝えゆるびけんやらー、やな 覚 いぐゎーそーる外国語やてぃん役立ちゅん。やしが、チムグクルんでー感情んでえ、肝ぬ思い語ゆるばそお、外国語しえ、ちゃしん伝えゆるくとぅぬならんニュアンスぬ違えみぬあぬくとぅ、思い知ゆるばすぬあん。共同体（国、地域また民族）ぬかじなかい違とーる言語や、単語、文法うりに音韻が違とーるびけんやあらん。長えさる歴史通ち、人んちゃあぬ暮らし道、考え方、行動パターンんでーねーそーる共同体ぬ個性ゆ表わちょーる独なあくるぬ様式（文化）とぅまじゅん、立てぃらってぃちゃしがるくとぅばやる。「思い」や、「肝」から出じゆるむぬどぅやくとぅ「くとぅばー肝やん」んでぃちしむん。うぬくとぅ、共同体レベルし考えいねー、言語や「民族ぬ肝やん」んでぃ言ちんしみーがすら。言語ぬ違えみえチムグクルぬ違えみまでぃ及ぶるばすやん。
さてぃ、沖縄や今あ大和ぬてぃーち地方とぅなやい、へーくぬ琉球語が、てーげー、「日本語ぬ一方言」やんでち、けー片付きらっとーる今ちきてぃ、うちなーんちゅが考えとーる「日本人」んでぃしえヤマトゥンチュんでぃしとー同ぬむのーあらん。うちなーんちょー「日本人」やるくとぅまでー合点すしが、じょーいヤマトゥンチュやんでー思てーをらん。あたまから、うちなーんちゅくるが本格的に日本志向し始みたしえ長えさる歴史ぬなーかうとーてぃん、くぬ六十年ぐれーなむんどぅやる。今ちきてぃ多くぬうちなあんちゅぬ頭んかい、ウチナーンチュ対ヤマトゥンチュんでぃゆる対置意識ぬあしえ、いーくる皮膚感覚からぬむぬやん。ちむぬ文化ぬ深層化さーい、あんしまた皮膚化すぬあたい時ぬ経っちょーるばすやん。
いるんな系統ぬ言語ぬまちぶいかーぶいそーる西欧んじえ、人んちゃーや、じるぬ言語系統ぬ組やがんでぃゆるくとぅやか、今あぬ違えみんかいどぅ敏感やる。欧州連合ぬ統合や多言語主義提唱すぬくとぅにゆてぃ成たんでぃいちんしむい、言語ぬ細分化や、ゆくんはねーちょーん。分離・対立すしやか統合化んでぃゆる画一化ぬ流りぬ中うとーてぃる、独自性うりからまた民族心が刺激さりーるばすやるはじ。歴史とぅ背景ぬ違とぉーくとぅ、まるまるうとぅ沖縄とぅぬ比較やならんはじやしが、欧州統合とぅ沖縄が大和ぬんかい併合さったるくとー、「画一化」んでぃゆる共通項持っちょーん。共同体ぬ独自性や、まじえ言語んかい求みゆしがる普通やいぎさる。
何が、うちなーぐちんかい、あんししゅーみ持っちゅがんでぃ、ゆー訊かりーん。うちなーんちゅぬチムグクルやくとぅんでぃち、いれーたれー、どぅくカッコ良たさぬ恥じかさ思いさるばすやん。自ぬくとぅば使ゆるうぬ理由までぃん言ゃんでえならんがや。
字数等ぬ関係なかい沖縄タイムスぬ「唐獅子」とぅ文言ぬ違ゆるとぅくるぬくうてんぐぁああいびいん。
