Wp/rjs/শেষুআ স্বাধীনতা

নিজক হত্যা কৰিয়া কৰিয়া
বাছিয়া থাকাৰ অভিনয় কৰা
আমা একো একোজন অভিনেতা

আকাশেৰ মায়াবী চান, নক্ষত্ৰমণ্ডলী
পখিৰ সুমধুৰ কণ্ঠ,
অৰণ্যেৰ সবুজতাৰ সাথত বিনিময় নাকৰুং
আমা অনুভবী আকটা কবিতা
ভেল্টিলেশনদিয়া সোন্দেয়া আসা
অল্প বাতাস, অল্প ৰৌদ
ঘৰেৰ চালিৰ ফাঁকদিয়া
নিগৰিয়া অসা চানেৰ আলো
আমা প্রতিনিয়ত নিজেৰ কৰিয়া ৰাখাত আত্মবিভোৰ
খালি আকটা ঘৰ,
আকসাজ আহাৰ
কল্পনাৰ সাগৰত উটিয়া- ভাঁসিয়া
আত্মস্বাৰ্থত ডুব যাই
অথচ কল্পনাতে শেষ নাহায়
জীবনেৰ যাত্ৰা
অনাগত প্রতিদিনেৰ ৰুটিনেৰ ওচৰত বন্ধকত থ'ই নিজস্ব স্বাধীনতা

কলি কিম্বা চেংৰী ফুলেৰ ৰস যখন পান কৰে
যখন জনঅৰণ্যেৰ সবুজ পাথাৰত সিঁচে মৃত্যুৰ ছবি
ক্ষুধাত যখন জ্বলে ক্ষোভেৰ জুই
কির্ষকে যখন পাথাৰেৰ ঠিকিনা হাৰায়
যখন পানীত আত্মসমৰ্পণ কৰে ভূচিত্ৰাৱলীয়ে
আমা কি কৰিবাৰ পাইছেং
খবৰ কাগজেৰ খবৰ পঢ়িয়া
সাধাৰণ কাগজেৰ মতোন
ঝাপেয়া থোআৰ বাইৰে

জাতি-ধৰ্ম, ৰাজনীতিৰ সিৰা-উপসিৰাদিয়া বোয়া আইসে
বিভেদেৰ ছুনামি,
বিচ্ছেদেৰ জীবনেৰ থাকিয়া
যি ছুনামিয়ে চেলকিয়া ছাই কৰিয়া দিছে সভ্যতা
নেলীৰ থাকিয়া কোকৰাঝাৰ;
বঙাইগাঁও হোয়া বেলতলা
আৰ্ বৰ্তমান……… বোমাৰ গর্জন কিম্বা গুলীৰ ঝ'ড়িৰ ভয়ত
মৃত্যুৰথাকিয়াও দুঃসহ শীতলতাৰ একুৱাৰিয়ামত বিক্ৰী কৰুং
স্ব-নিৰ্ভৰশীলতা
পিন্ধুং পৰাধীনতাৰ পোসাক

আসেক মোৰ প্রিয় শান্তিকামী মানুষ
দুইহাত মেলিয়া মাওৰ চোখেঁৰজল মুছিয়া
মৰানদীখানেও পাউক
বোয়া যোওয়াৰ স্বাধীনতা……………………।

• মূল: কিশোৰ বড়ো
• ৰাওবদল: কন্দর্পজিৎ কল্লোল