Wp/rjs/ডুবিআ থাকা লেটুআ শামুকেৰ স্বপ্ন

ණ কন্দর্পজিৎ কল্লোল

ডুবিআ থাকা আকটা ছাইইঅ্যা লেটুআ শামুক
দুই চোঁখত ভৰেআ ন্যেয় সবুজ ঘাঁসেৰ সপ্ন

মুঁই কান্দাত বসিআ
দেখিআ থাকুং
জলকুমাৰীএ চুল মেলিআ
ডাক দ্যেয়
চুলেৰ আঁৰালেৰ থাকিআ
ভাঁসিআ আইসে মাছেৰ ছালেৰ গন্ধো

আকটা লেটুআ শামুকেৰ সপ্ন
কাঁশিআ ফুলেৰ বাস্না
আৰ জলকুমাৰীৰ বুকত
জলকুমাৰেৰ জলজ কায়া

এৰ থাকিআও কি বেসি
ভালা হৈবাৰ পায়
উদাসিনতাত বসিআ থাকা
আকটাচিল্লা উৰা দিফৰ বেলা !