Wp/pyu/a batibatiyan dra piya sanasan pataban mulaliyaban

a batibatiyan dra piya sanasan pataban mulaliyaban

mulaliyaban i tu trepa dra mainayan a kasangalan.

itralri driya i kadru a mingalad kan Atakiyu, an demadukul dra abay a trau i sagar parekudakuda, parabaitr kema muyuwi, na trau lra mupatraran kadri salidr muka brnaawa, taytaw i kiremawmaw muka i sabak kana ruma kana demadukul. i likudran i tu kalradramaw dra trau, aw tu sauraw tu trau, kilrengaw lra tu trau i kamelri lra igelra dra trau. idru i Atakiyu i adri madradranga pamelri aw, tu nirumaenan i kulaluy paradrukaw a drinekalranan aw tu pilrangaw idri Atakiyu muka i sanasan malrupa, kana paalrualrup i tu baresayaw mereput idru tu rami kana batriyulr na kemay sanasan semapay paredek kadri taywan, tu burawaw idri Atakiyu, kadruwa lra kadru kema. a biruwa kadri makasatr i lraman kantaw, na biruwa i pakarun dra kuraw dra matrina tu dradrek druwa puysatra kantaw palabat dra ine, i marengay na kuraw, maengadr ku i sabak dra enay aw kan muleden ku an kakuwalengan yu mengadr i getilu ku pati, an temabaw ku i maruwayayu mengadr tu kayaw, an meredek ta kadri sinilriyalriyawan iten ku paretulun tu kayaw. Ina kuraw lra i tu palretrikanay drat u ikur kadri budebudek, idri Atakiyu i malitralitr, i tu pungaladay lra kan “Alitralitr”. mukisatran lra kadri sunilriyalriyawan i marengay na kuraw “an piya mu mareani dra dawa, i likudran i kemureta mu dra wari druwaya mu kadri laliyaban mu wapakinialriay ku.” kema kemay kandri i likudran i nantu nirumaenan driyan kana Atakiyu na ararasis, kana aamiami mukuwa kadri laliyaban pakan semungal kandru kana kuraw, idri i a biruwa kadri makasatr.