Wp/pwo/ပကလ့ၩထၪ့လ့ၩထီၫအဂး ပကမၩဝ့ၫဒၪဘဲၫၥ့ၪလဲၪ

From Wikimedia Incubator
< Wp‎ | pwo
Wp > pwo > ပကလ့ၩထၪ့လ့ၩထီၫအဂး ပကမၩဝ့ၫဒၪဘဲၫၥ့ၪလဲၪ

ပကလ့ၩထၪ့လ့ၩထီၫအဂး ပကမၩဝ့ၫဒၪဘဲၫၥ့ၪလဲၪ?

  ပဆၧၥၭမၧၫ့ကလ့ၩထၪ့လ့ၩထီၫအဂး အဆိၪထုၬပကဘၪမၩဝ့ၫဒၪနီၪ ပကဘၪအီၪက့ၪထၬဆၧထိစိၩ(ခ) ဖီၫထုၪ့နီၪလီၫႉ ဆၧထိစိၩနီၪမနီၪလဲၪ ဖီၫထုၪ့နီၪမနီၪလဲၪ? ပကဘၪလီၩယီၫယီၫနီၪဘိၭ ဆၧထိစိၩဖီၫထုၪ့နီၪ စံၭမၬချၬ ဘဲၫယီၩနီၪ ယၥၭအီၪ၂၀ အ့ၪမွဲယၥၭအီၪ၃၀ကိနီၪ ယကဘၪကဲၪထၪ့ ၦအအၪ့ဆၫဆၧၦၥထံၫကဂၩ ပအီၪက့ၪထၬ ဆၧထိစိၩထံၪထံၪဆၭဆၭ ဘဲၫယီၩအၥိၭနီၪ မွဲလၧပကလ့ၩထၪ့လ့ၩထီၫအဂး ပဘီၩ့လၩ့ထၬပဖီၫထုၪ့နီၪလီၫႉ

နံၫမံၩ့ကမံၩ့နီၪ ပဘီၩ့လၩ့ထၬပဖီၫထုၪ့နီၪဂီၩ့ယူၭ ပဒၪစိၩပဖီၫထုၪ့နီၪယူၭ ဆၧနီၪအကၠီၩ့ ထၧၩ့ပလ့ၩကထီၩ့စိၩ လၧ ပဖီၫထုၪ့အီၪအလးနီၪ ပကဘၪကျ့ၭစၨၭဝ့ၫဒၪနီၪလီၫႉ လါနၫ့ပကဘၪထုၪ့ပၥၭကထံၪနီၪ လၧပလ့ၩစိၩလၧ ပဖီၫထုၪ့အလးအခၫနီၪ ဖၧၩ့ၥၭအကျၩ မွဲဆၧကၪဆၧဂဲၩကအီၪဝ့ၫဒၪအၪမၬနီၪ ပကဘၪနၪၥ့ၪထၬဂီၩ့ ပကဘၪခၫ့ဂၬ ခွံၬ ဆၧကၪဆၧဂဲၩလဖၪထၧၩ့အန့နီၪလီၫႉ ၃ထံၪကထံၪနီၪ လၧပၥၭဖၧၩ့ မွဲပကဘၪအၪ့လုထၬ ၥၭအမုၬ ၥၭအဂ့ၩလၧ ကလ့ၩကိၭန့ပၧၩလၧ ဆၧလ့ၩ ထၪ့လ့ၩထီၫအလးနီၪလီၫႉ စံၭမၬချၭ- ကနံၩယီၩ ယအၪ့ဆၫဆၧ ကဘၪန့ဝ့ၫ အၡၩထုၬ၂လၬအဎွ့ၩ အ့ၪမွဲလန့ဘၪ ၂လၬဘၪစွါဘဲၫ ယအီၪပွံၭအ့ၬ ႉ ပကဘၪအီၪက့ၪထၬ ၥၭဘဲၫနီၪအၥိၭနီၪလီၫႉ ၄ထံၪကထံၪနီၪ ပကဘၪစံၭလၩ့ပၥၭ ယကလ့ၩထၪ့လ့ၩထီၫအဂးနီၪ အီၪၥုၪ့လၩ့ထၬအၥၭ လၧယဖၫ့ခိၪလီၫ ပကဘၪစံၭလၩ့ပၥၭဘဲၫနီၪအၥိၭနီၪလီၫႉ ၅ထံၪကထံၪနီၪ ပကဘၪအီၪပဲၩ့ခွံၬ ၥၭလၧအခဲၫ့ကံၭဆၧ ၥၭလၧအၥၭမဲၪဆၧလဖၪနီၪလီၫႉ စံၭမၬချၭ - ပမၩ ဘၪဆၧနးမံၩ့ဒံၭအ့ၬႉ အ့ၪမွဲယမၩထၪ့ဆၧအယီၩစွါဘဲၫ မွဲယထီးကလူၬဂီၩ့လူၬစၪဒၪယၧၩဧၪ မကဲၪထၪ့ကၥ့ၪဧၪ ၦၡၩ အနီၪစံၭယၧၩ အ့ၪမွဲယမၩဆၧမၩအယီၩစွါဘဲၫ ယကဲၪထၪ့ကဲၪထီၫ မွဲကန့အ့ၬစွါဘဲၫ ၥၭအၪ့ယိၫခဲၫ့ကံၭဆၧ ဘဲၫယီၩ ၥိၭလဖၪနီၪ ပကဘၪမၩပျၩ့ခွံၬဂီၩ့ ပကဘၪထိၪတွၭအၪ့ဎါထၪ့ဒၪ ပလ့ၩထၪ့လ့ၩထီၫအဂဲးလဖၪနီၪလီၫႉ ၆ထံၪကထံၪနီၪ ပဒၪဆၧၫ့ယၫလၧဆၧအၪ့ထၩလဖၪအခၫနီၪ မွဲပကဘၪဒုၭဆၧၫ့ခွံၬထၧၩ့အန့နီၪလီၫႉ ၇ထံၪကထံၪနီၪ လၧပဆၧထိစိၩဖၧၩ့ၥၭအဖၫ့ခိၪ လၧပဖီၫထုၪ့ဖၧၩ့ၥၭအဖၫ့ခိၪနီၪ မွဲပကဘၪအီၪဂုးဂုးၡၪၡါ နီၪလီၫႉ ထီးလ့ၩဝံၩ့လ့ၩဝၩ့ဘၪလၧ ဖၧၩ့ၥၭမုအဂူၪဂၩလဂ့ၩ အ့ၪမွဲနကလ့ၩဝံၩ့ဝၩ့လၧ ဖၧၩ့ၥၭအဂူၪဂၩစွါဘဲၫ နကလ့ၩ လၧနဖီၫထုၪ့အလး ဖၧၩ့ၥၭနီၪ မွဲကလၩ့မါဒၪနၧၩနီၪလီၫႉ လခဲၫ့ထုၬနီၪဘိၭ ပကဘၪဖ့ၪနဲၪၦဂူၪဂၩ ပဂဲၫထဲၩ့မၩန့ထၬ ဆၧအချံၫအဖီၫလဖၪနီၪလီၫႉ စံၭမၬချၭ - လၩက ဘံၪ့အထးဖၧၩ့ နဂဲၫထဲၩ့အၪ့ဆၫဆၧန့ထီးဎွ့ၩပၥ့ၪလဲၪ နဘၪထိးလူၬထၬထီးအီၪဎွ့ၩပၥ့ၪလဲၪ လၩကဘံၪ့ အထးဖၧၩ့ နဂးအီၪထးဎွ့ၩပၥ့ၪလဲၪ ကနံၪ့အထးဖၧၩ့ နဂးအီၪထးဎွ့ၩပၥ့ၪလဲၪနီၪ နဂဲၫထဲၩ့မၩထၪ့ဆၧမၩယီၩအခၫနီၪ နဂဲၫထဲၩ့ ဒၪထၪ့လၧဆၧကၪဆၧဂဲၩ ဎွ့ၩပၥ့ၪလဲၪအဂဲးလဖၪ ဆၧကၪဆၧဂဲၩလဖၪနီၪ နဂဲၫထဲၩ့ခၫ့ဂၬခွံၬပၥ့ၪလဲၪအဂဲးလဖၪနီၪ နကဘၪဖ့ၪနဲၪၦဂူၪဂၩဂီၩ့ လၧဆၧကၪဆၧဂဲၩအဖၧၩ့ နဂဲၫထဲၩ့မၩထၪ့န့ဝ့ၫဒၪအဂဲး နကဘၪဖ့ၪနဲၪၦဂူၪဂၩ အဒီၩ့အထ့ၬ နီၪလီၫႉ နးအဲၪဖီၫဘွၩ