Wp/pwn/valeng

From Wikimedia Incubator
< Wp‎ | pwnWp > pwn > valeng

kasicuayan ka nekanan nu pingsiang i qinaljan, kudain a penadjeng a vutjulja nu ayaitjen, aven anga a velang a namasan papadjengan tu vucutj i pasanavalj ta se Paiwan, patjetucu aicu a venaleng namasan paravac saka sanguqan anga tua kakanen nua senavalj tua se Paiwan.

kudain nu venaleng[edit | edit source]

azua tjauculjuin a vutjulj puqatianan tu pacengceng, sa duveci tua adradj a pinuqatianan, sa pasa tua kapua tuki galasu a kana, pai maqati anga pakacuacuain a liaw a cavilj, nu namasan paravac a qadaw nu izua qaljaqalja patjevutain anga aicu a valeng sasan siavianga.

lemikezalj[edit | edit source]

aicu a veleng sedjalep ita kaljaqudjaljan kata kakavuceleljan, tjaljasanguaqan a siyaw ta sin vasa kemsan a adradj. ita namasan pazangal a palisian, nu izua qaljaqalja i tjumaq, nu qemaljaqalja tua qaljaqalja i qinaljan tjalja sanguaqan tua kakanen aicu a valeng. a valeng namasan sikipucemcemel uta nua vavayavayan nu na pualjak. aicu a valeng namasan paravac a ravac tua kakanen i pasanavalj tua se Paiwan.

valeng a “siraw” nua amizuku[edit | edit source]

valeng, izua a ‘inamizukuan a “siraw”. nadjemaung a amizuku a lami, izuanga a ciqaw, pias, vutjulj kata vangvang, sa maqatianga a sinannguaq. kasicuacuayanga, mauram ta kakanen, sa sinanpazangal taicu a lami. nakemananga a caucau, sa uri naqivu tiamadju tua nu izuanga a siraw, maqati a nakakan tua ita a kisi a kinsa. inika nakeman ta siraw tuqadavan kasicuayan, mavan a tjaljapazangal a lami i padausi kata patalidu.

semanvaleng[edit | edit source]

kasicuacuayan, amin a cemulju tua kakanan nu izuanga a pazanagal a pacugan, masa inika madjulu a inalapan tua vutjulj, sa uri kiceviq ta vutjulj tua semanvaleng. nu semanvaleng, uri papetad ta vutjulj kata puqatia( maqati a pazaljuan ta vawa, paday, ljameljam, 蒜a pasusu ta kakudan), sa inika mamau ta zikang tua djemaung a vutjulj nu maretimalji a kinaqadavan. azua a vutjulj tua semanvaleng, mavan a cemuljuculju kaizuanan, saka maqati a sanguanguaq.

a palisi tua semanvaleng[edit | edit source]

uri kipapaulingaw ta palisi nu semanvaleng a siraw, matu inika semanvaleng a liaw a zengzengan i lima nua caucau, kata nu mecevung ta saqetjuan, maqipel, tuki madjaq, uri seljekuya sa vangculanga ta siraw.

valeng a “siraw” nua tayaruzuku[edit | edit source]

valeng, izua a ‘intayaruzukuan a “Tmmyan”, kata “Cinm'mian”uta, mavananga a tjaljaparavacan a lami nua tayaruzuku, izuanga vutjulj, qatia, vawa, paday. kasicuacuayanga, nekanga a pingsiang, sa uri sinanvaleng ta sinannguaq a vutjulj na tayarzuku, aza a valeng a namesuakanga, uri sanguanguq aravac kata kinatjengelayan a taqaljaqaljan.

cinalivatan[edit | edit source]

neka a pingsiang kasicuayan, izuazua a tayaruzuku i gadugaduan, masa karakudakuda tiamdju imaza, uri mazengzeng aravac tiamadju, sa kinasaljinga ta qatia niamadju. ljawa, izuazua a tayaruzuku i gadugaduan, inika madjulu kinasaljinga ta qatia, kata inika madjulu a sinannguaq a qatia uta. saka, semanvaleng a tayaruzuku tua sinannguaq a vutjulj, ika vangculanga ta vutjulj, kata maqati a kinasaljinga ta qatia nia taqaljaqaljan. saka, maqati a semanvaleng tua ika piteval ta vutjulj ka naka a pingsianganga.

semanvaleng[edit | edit source]

nu semanvaeleng a Tmmyan, kinasaljinga ta vuljulj, paday tuki vaqu, kata qatia. sa ika makesa ta paday tuku vaqu, qaw inika lumeljak aza a lami. sangasangasang, qinatian(‘intayaruzukuan: smcimu) azua a vutjulj tuki ciqaw tazua vengin nu semanvaleng, kata maqezet a qaciljay, sa djemaung(‘intayaruzukuan:tmami) nutiaw. nu semanvaleng, uri djemaung a vutjulj kata zuma a djamay. a susuan tua semanvaleng, sangasangasang, uri papizuanan a djamay iteku, sa papizuanan a vutjulj tuki ciqaw, matu kipasusu matucu tua djamay kata vutjulj. nu papizuanan a vutjulj ivavaw tua nadjemaung a djamay, sa papizuanan a nacempuanga a kaljavuan ivavaw taizua, kata maqezet a liaw a qaciljay izua sa qemeljepetj, saka qemacuvunganga a semanvaleng.

pacunu uta[edit | edit source]