Wp/pse/Basau Melayu Tenga

Artikel ngguk Basau Serawai

Basau Melayu Tenga atak Melayu Barisan Selatan adaulah sutiak cangkah jak di basau Melayu yau ditutughka ngguk wilayah Sumatera Belah Selatan, dataghan tinggi tenga Bukit Barisan, baghat ke Samudra Hindia selarik pantai Bengkulu, timugh ke lemba-lemba ayiak Lematang ngan Ogan; Muara Enim selatan, ngan Lahat bela timugh ngan tenggara.

Basau ni merupauka bentuak dialek continuum jak di tunggalan dialek-dialek malayik yau adau nyemegi ngan pacak seaningan atak semasu'an sutiak ngan yau lain ngguk tingkat kepahaman tertentu. Dialek-dialek yau ditutughka ngan penutugh basau ini biasawau mewakilka ragi khas kesukuan memasing penutugh ngan nganca'ka pengaruh alam luk pengasingan ikak pegunungan ngan batang ayiak nggut melainka tutughan-tutughan basau tiap suku.

Lajuwau, dialek basau ini tebagi njadi 2 kelompok yau tu kelompok dataghan tinggi ngan kelompok Ogan.

Di ISO 639-3, basau ni dienjuak kode 'pse'.

Ragam Tutughan (Isolek/Dialek)

Bedasarka jak penelitian McDowell ngan Anderbeck (2020), Basau Melayu Tenga atak Melayu Barisan Selatn tebagi duau:

1. Kelompok Dataghan Tinggi

Kelompok ni adau 9 isolek/dialek yau adau kesamauan kosa katau 78%:

a. Besemah

b. Lintang

c. Semende

d. Serawai

e. Benakat

f. Lematang Ulu

g. Kaur

h. Bengkulu

i. Pekal

2. Kelompok Ogan

Kelompok ni tebagi njadi 3 isolek/dialek yau adau kesamauan kosa katau 85%:

a. Ogan

b. Rambang

c. Enim

Pulihan kesamauan kosa katau jakdi gegalau dialek-dialek ini kurang lebih 79%, anyau batan Pekal ngan Kaur amau ngikutka Glottolog, diasingka njadi basau lain ngan memasing dienjuak kode ISO 639-3 ikak basau Pekal ngan basau Kaur paling melain jakdi gegalau dialek Barisan Selatan. Basau Pekal agak melain ikak adau pengaruh jakdi Minangkabau ngan Rejang, amau Basau Kaur ikak adau pengaruh jakdi Basau-basau Lampung.

Adangan

Adangan basau ini semegi ngan adangan basau daerah yau lain luk adaunyau basau besak (Indonesia ngan Inggris), sikap penutugh, ngan teputusau basau antarau generasi.

Penyaihan

Basau Melayu Tenga (Melayu Barisan Selatan) ni gi rami digunauka ngan penutughau seaghi-aghi luk di ghumah, sekul, ngan di acara-acara adat. Penutughau pulau galak makai basau ni amen dang di badah asli penutugh mpuk lauk ngicia'au ukan jemau penutugh basau tu.

Amau penutugh basau Melayu Barisan Selatan betemu penutugh basau ni ngguk bada luagh atak rantau jemau, biasawau galak ngiciak makai basau ini.

Mpuk basau ni lum diajaghka ngguk sekul, anyau seaghi-aghi ngguk sekul, siswa-siswi galak makai basau ini batan begaul ngan sepantaranau nggut ngan guru sekalipun.

Adau pulau usaha batan ndak nyaih basau ni ngan mbuati kamus basau daerah, buku ceritau, ngan lomba-lomba bebasau Melayu Barisan Selatan.