Wp/ppl/Francisco Jiménez

Ne wey tamachtiani Francisco Jiménez.

Kaj tiktukeytiat Francisco Jiménez, yaja nesik tik ne techan Tlaquepaque tik México se tunal se pual chiknawi pal ne metzti yey tik ne shiwit se shikipil chiknawi tzunti ume pual yey (29/03/1943). Yaja se wey tawawasuani, se wey tamachtiani wan tamachtia tik ne wey tamachtiluyan Santa Clara tik California tik Estados Unidos.

Itunal ichtaka

Ne techan Santa María.

Tamachtiani Jiménez nesik tik ne techan Tlaquepaque tik México. Yaja kipia se imanuj wan chikwasen ijikawan. Keman nemituya kunet ichan nemituya tik ne techan El Rancho Blanco tik ne estado pal Jalisco tik México, peroj keman kiajshitilij nawi shiwit imiekawan wan yaja kisket pal México wan yajket ka Estados Unidos pal tekitit tik ne tajtapishkal. Keman kiajshitilij chikawen shiwit, pewki tapishka. Keman nemituya piltzín, imiekawan wan yaja tekitituyat tik miak tejtechan wan tesu ishtikaya welituya yawi ka tamachtiluyan.

Keman mumachtijtuya ne chikwey shiwit tik ne tamachtiluyan, ne tajtatuktianimet kinishtijket ne piltzín Francisco wan imiekawan pal ne Estados Unidos wan kintuktij ka México. Nemanha, ne gobierno pal Estados Unidos kinmakak amat pal ma mukwepakan ka California. Keman mukwepaket pewket tekitit tik ne Rancho Bonetti nemik tik ne techan Santa María. Ne piltzín Francisco iteku tesu welituya tekiti ika kinpiyatuya se wey kukulis wan se wey titika tik iteputzta. Keman ne piltzín Francisco mumachtijtuya ne secundaria, yaja wan imanuj itukey Roberto tekitituyat kipupuat ne tamachtiluyan pal kipalewit imiekawan.

Kiajshitilij itamachtilis pal ne secundaria nemanha yajki ka ne wey tamachtiluyan Santa Clara pal mumachtia ne taketzalis wan ne amaketzalis tik Kastiya. Keman mumachtijtuya tik ne wey tamachtiluyan, yaja muchiwki ciudadano naturalizado ipal Estados Unidos. Nemanha, ne mumachtiani Francisco kimanamikik se wey beca pal mumachtia tik ne wey tamachtiluyan Columbia. Man kiajshitili imaestría wan idoctorado ipal ne amaketzalis pal Latinoamérica.

Keman mumachtijtuya tik ne wey tamachtiluyan Santa clara, ne mumachtiani Francisco kishmatki isiwaw itukey Laura Facchini. Kipia yey iujukichpíltzin yajawan isiwaw.

Itekiw

Achtu ne tamachtiani Jiménez tamachtij tik ne wey tamachtiluyan Columbia, wan nemanha yajki ka ne wey tamachtiluyan Sanata Clara kan sujsul tekitik hasta ne shiwit ume shikipil chiknawi kashtul (2015). Tikishmatit ika yaja tamachtia yek wan kinmanamikituk miak reconocimientos. Tamachtiani Jiménez nusan kinchiwtuk miak itekiw administrativos tik ne wey tamachtiluyan Santa Clara wan tik seyuk instituciones kan timumachtiat wan kan ne tajtamachtianimet tekitit. Wan nusan kichiwki se wey amat itukey The Bilingual Review pal ne tajtemuanimet ma tawawasukan ipal ken titajtaketzat Kastiya wan inglés tik Estados Unidos.

Tik ne shiwit shikipil chiknawi se pual nawi pual cashtol ume (1997), tamachtiani Jiménez kiwawasuj se achtu iamach itukey The Circuit: Stories from the Life of a Migrant Child tik englés, wan itukey Cajas de Cartón tik Kastiya. Tik imach tajtaketza ipal inemilis keman nemituya piltzín wan kiski nejnemi pal México wan ajsik Estados Unidos, wan nusan keman mumachtijtuya wan tapishkatuya. Nemanha kinwawasuj yey amachti kan tajtaketza ipal inemilis keman muchatijtuya secundaria, ilicenciatura, imaestría wan idoctorado. Ne amachti ipal secundaria itukey Breaking Through tik inglés wan Senderos fronterizos tik Kastiya. Ne amachti ipal ilicenciatura itukey Reaching Out tik inglés wan Más allá de mí tik Kastiya. Wan ne amachti ipal imaestría wan idoctorado itukey Taking Hold: From Migrant Childhood to Columbia University tik inglés wan Pasos firmes: Desde niñez migrante a la Universidad de Columbia tik Kastiya. Tamachtiani Jiménez nusan kiwawasujtuk sejse amachti inwan ikwikwil ipal inemilis. Yaja kinmanamikituk miac premios ipal iajamachmet, wan seyuk tajtawawasuanimet kinpataket iajamachmet ka chino, corenao, japonés, italiano, farsi wan Kastiya.

Tik ne shiwit ume shikipil chiknawi kashtul (2015), kitukeytijket se tamachtiluyan “Roberto and Dr. Francisco Jiménez Elementary School” pal yaja wan ne imanuj. Ne tamachtiluyan nemi tik ne techan Santa María. Tamachtiani Jiménez nusan kinmanamikituk miak reconocimientos pal ne gobierno Méxicochanej wan ne gobierno EstadosUnidoschanej.