Wp/oka/sn̓ʕay̓ckstx

From Wikimedia Incubator
< Wp‎ | okaWp > oka > sn̓ʕay̓ckstx
Jump to navigation Jump to search

q̓sápiʔ, iʔ sn̓ʕ̓ay̓ckstx kʷliw̓t l̓ yʕacín̓s n̓sl̓xʷʔitkʷ, tl̓ n̓ʔiƛ̓l̓tk k̓ík̓aʔt k̓l̓ ʕapnáʔ c̓um̓stəl̓x t Revelstoke, k̓l̓ sʔaw̓tím̓tk uł k̓l̓ Sx̌ʷnitkʷ. iʔ sn̓ʕ̓ay̓ckstx nixʷ ta ck̓l̓ yʕacín̓s iʔ t̓k̓ʷt̓ik̓ʷt iʔ sn̓ʕ̓ay̓ckst, słuʔqín̓, kłxʷəxʷmínaʔ uł ktunáxa. iʔ sn̓ʕ̓ay̓ckstx nixʷ itíʔ kʷl̓kʷliw̓t l̓ n̓x̌ʷiyałpítkʷ uł ta ck̓l̓ yʕacín̓s iʔ saʔsaʔtítkʷ iʔ słuʔqín̓ uł iʔ st̓il̓tx, skiʔxʷútm̓s l̓ ktunáxa iʔ t̓ik̓ʷts. iʔ sn̓ʕ̓ay̓ckstx tl̓ ʕ̓ay̓ckst kiʔ taʔxʷskʷíst. p̓ísƛ̓aʔt t qaqxʷl̓x. yʕat l̓ t̓k̓ʷt̓ik̓ʷt iʔ l̓ sn̓ʕ̓ay̓ckstx tm̓xʷúlaʔxʷs akskakícm̓ iʔ ʕ̓ay̓ckst. iʔ sn̓ʕ̓ay̓ckstx sisyíkst ła ck̓ʷul̓m̓ t ƛ̓ʔiʔ tl̓ k̓iʔlílxʷs iʔ ƛ̓iʔíłp. iʔ n̓xaʔcín̓s iʔ ƛ̓ʔiʔs c̓x̌ił t c̓m̓tus iʔ sp̓saqsts. x̌ast asksʔúclm̓ l̓ ƛ̓x̌itkʷ iʔ l̓ sn̓ʕ̓ay̓ckstx iʔ tm̓xʷúlaʔxʷs. iʔ sn̓ʕ̓ay̓ckstx iʔ tm̓xʷúlaʔxʷs xʷʔit əcq̓it. łʕát̓laʔxʷ uł xʷʔit itíʔ iʔ wswist. c̓x̌ilx lut ilíʔ t̓a cplal̓ iʔ sp̓iƛ̓m̓ l̓ sn̓ʕ̓ay̓ckstx tm̓xʷúlaʔxʷs. lkʷut tl̓ n̓sl̓xʷʔitkʷ, sc̓x̌ilx lut qʷay̓ iʔ n̓ty̓tyix l̓ sn̓ʕ̓ay̓ckstx saʔsaʔt̓ítkʷ naʔł t̓k̓ʷt̓ik̓ʷt. yʕat spin̓tk iʔ sn̓ʕ̓ay̓ckstx ckłqaqxʷl̓xm̓ k̓l̓ Sx̌ʷnitkʷ. k̓l̓ Sx̌ʷnitkʷ iʔ sn̓ʕ̓ay̓ckstx cpul̓x l̓ ksun̓kʷ kwistm̓s iʔ syəxʷmitkʷ. nixʷ k̓l̓ słuʔqín̓ iʔ sn̓ʕ̓ay̓ckstx ckʷn̓nusts iʔ n̓ty̓tyix uł k̓l̓ n̓c̓akuʔławíʔłxʷ. nax̌m̓ł lut taʔlí qʷay̓ iʔ n̓ty̓tyix l̓ sn̓ʕ̓ay̓ckstx tm̓xʷúlaʔxʷs kiʔ tl̓ k̓ʷiƛ̓t iʔ syilx tm̓xʷúlaʔxʷs. itlíʔ uł iʔ sn̓ʕ̓ay̓ckstx cmispíx̌m̓ uł cmisn̓ʕacúsm̓ kiʔ tl̓ k̓ʷiƛ̓t iʔ syilx. xʷʔit iʔ styíłc̓aʔ l̓ sn̓ʕ̓ay̓ckstx tm̓xʷúlaʔxʷs. ixíʔ uł pix̌səl̓x iʔ styíłc̓aʔ. x̌ʷw̓n̓tisəl̓x uł cn̓ʔay̓xʷw̓scín̓ t sp̓iƛ̓m̓ km̓ t stim̓. nixʷ qʷay̓qʷy̓t iʔ st̓xałq ixíʔ nixʷ əcn̓ʔay̓xʷiw̓sm̓stsəl̓x t sʔiłn̓. caʔáqʷm̓ cʔam̓xlwís iʔ sn̓ʕ̓ay̓ckstx. iʔ k̓ʷiƛ̓t ctkəłam̓ itíʔ cxʷilwís, km̓ cʔúluʔs iʔ k̓ʷiƛ̓t. x̌ƛ̓x̌iƛ̓m̓ k̓l̓ wist k̓aw̓sq̓ʷl̓q̓ʷlíw̓m̓ t st̓xałq uł k̓aw̓spíx̌səl̓x iʔ sx̌ʷƛ̓iʔ. my̓may̓t iʔ sn̓ʕ̓ay̓ckstx ck̓ʷl̓k̓ʷul̓m̓ t sʕacílkst tl̓ sx̌ʷƛ̓iʔ iʔ spum̓ts. caʔáqʷm̓ uł xʷuy̓y̓ k̓l̓ Sx̌ʷnitkʷ ilíʔ ckłqaqxʷl̓xm̓ uł cn̓ʔay̓xʷíw̓sm̓. l̓ scaʔáqʷ iʔ sn̓ʕ̓ay̓ckstx l̓ sxʷul̓łxʷ kiʔ n̓kʷliw̓t. k̓ʷl̓k̓ʷul̓məl̓x t tukʷtan̓ km̓ t mxiłp k̓iʔlílxʷs. ixíʔ t ctcitxʷ t̓it̓ym̓t łə k̓ʷul̓łxʷsəl̓x uł łə ksix̌l̓xstsəl̓x. k̓aʔáym̓ iʔ sn̓ʕ̓ay̓ckstx xʷʔit ła cƛ̓xʷam̓ t sƛ̓aʔcínm̓ uł xʷʔit ła ctixʷm̓ t kəkn̓iʔ tl̓ t̓k̓ʷt̓ik̓ʷt aʔ ckumnm̓ k̓l̓ cw̓cw̓íxaʔ. łə p̓uƛ̓m̓ iʔ sk̓aʔáy̓, iʔ sn̓ʕ̓ay̓ckstx ʔúl̓luʔs l̓ sn̓ʔistktn̓səl̓x. txʷaʔxʷʔit ilíʔ ksʔúl̓luʔsts l̓ sn̓ʔistktn̓səl̓x. ʔistkm̓, iʔ sn̓ʕ̓ay̓ckstx n̓ʔim̓x l̓ q̓ʷc̓iʔsəl̓x. ł aksk̓ʷúl̓m̓ t q̓ʷc̓iʔ, n̓ciqn̓txʷ síl̓xʷaʔ t yir mat kaʔłís km̓ mus sc̓uʔxán̓ iʔ ksnixʷúts. ixíʔ uł k̓ʷul̓mn̓txʷ iʔ yul̓t ckp̓niw̓s tqil̓tkm̓s aʔ cn̓łəx̌ʷúlaʔxʷ. tqəmnínaʔs iʔ yul̓t t tkl̓kl̓xmikstn̓, sic ktpínaʔs t tukʷtán̓ sic itlíʔ klíq̓naʔs t łúkʷlaʔxʷ. l̓ tqil̓tk cłax̌ʷ itíʔ iʔ sqilxʷ kaʔ cn̓ʔułxʷ km̓ ʔácqaʔ ck̓ʷul̓m̓sts iʔ kłaʔxn̓tan̓ uł nixʷ itíʔ iʔ spuʔúl̓ cʔácqaʔ. iʔ sn̓ʕ̓ay̓ckstx kłəʔam̓ nəqsl̓xʷiw̓s k̓l̓ syilx k̓l̓ ʔaw̓tímtk, iʔ sx̌ʷy̓ałpítkʷx, uł c̓x̌ił itíʔ ła cqʷaʔqʷaʔál̓ cn̓syilxcn̓m̓. q̓sápiʔ iʔ sn̓ʕ̓ay̓ckstx naʔł sx̌ʷy̓ałpítkʷx cq̓łw̓scut ckʷn̓twixʷ cmrim̓. iʔ sn̓ʕ̓ay̓ckstx lax̌tm̓s iʔ ql̓spil̓x ixíʔ ta ck̓l̓ sk̓ʷƛ̓ptan̓ kaʔ cwəxwix, uł nixʷ iʔ sixʷápmx ixíʔ k̓a n̓ʔiƛ̓l̓tk kaʔ cwixəl̓x. cl̓ax̌tm̓sts iʔ st̓il̓tx, nax̌m̓ł naqs taʔlí tiyáqʷt iʔ sn̓ʕ̓ay̓ckstx naʔł st̓il̓tx. x̌ilm̓ itíʔ ła ck̓aw̓skłqáqxʷl̓xm̓ iʔ st̓il̓tx k̓l̓ n̓c̓akuʔławíʔłxʷ, k̓l̓ syəxʷmitkʷ. n̓k̓aʔsíls iʔ sn̓ʕ̓ay̓ckstx, ʔaluʔscútəl̓x uł tkʷupxnm̓s tiyáqʷtstsəl̓x iʔ st̓il̓tx. ƛ̓xʷupsəl̓x iʔ st̓il̓tx uł lut nixʷ xiʔxiʔstísəl̓x łə kskm̓am̓səl̓x t n̓ty̓tyix. itlíʔ uł łlx̌tiw̓s iʔ sn̓ʕ̓ay̓ckstx naʔł st̓il̓tx. t̓iʔ knaqs iʔ y̓lmixʷm̓səl̓x ixíʔ y̓lmixʷm̓ k̓l̓ yʕayʕátəl̓x. łə k̓iwl̓x iʔ y̓lmixʷm̓ ixíʔ iʔ sqʷsiʔs itlíʔ ły̓lmixʷm̓. lut łə ksqʷsiʔ uł iʔ st̓m̓kʔil̓ts mi ły̓lmixʷm̓. yʕat aʔ cwəxwix kły̓lmixʷm̓, n̓k̓ʷak̓ʷín̓iʔs hakín̓ mi y̓lmixʷm̓ k̓l̓ spix̌m̓ uł knaqs k̓l̓ skłqaqxʷl̓xm̓. ła cmrim̓ iʔ sql̓tmixʷ naʔł tkəłmilxʷ iʔ sn̓ʕ̓ay̓ckstx, cłəx̌mam̓ k̓l̓ tkəłmilxʷs iʔ snəqsilxʷs. ła cliq̓stsəl̓x iʔ sn̓ƛ̓lal̓s, kłəʔam̓ k̓l̓ saʔtítkʷ km̓ kłəʔam̓ k̓l̓ t̓ik̓ʷt mi liq̓səl̓x. ʕapnáʔ, cmistísəl̓x ixíʔ sn̓ʕ̓ay̓ckst iʔ sckakícsəl̓x łə ƛ̓qn̓tisəl̓x kłəʔam̓ l̓ siw̓łkʷ uł c̓kin̓ iʔ ksəcpn̓pn̓xan̓s. łə cy̓ʕap iʔ sámaʔ lut x̌ast k̓l̓ sn̓ʕ̓ay̓ckstx. cxʔit q̓al̓ʔíl̓t t kaʔcqʔíc̓aʔ uł txʷaʔxʷʔít iʔ ƛ̓axʷt. sic itlíʔ kakícməl̓x t kʷəkʷrit naʔł piqsxn̓ l̓ sn̓ʕ̓ay̓ckstx tm̓xʷúlaʔxʷ, ixíʔ uł xʷʔit iʔ sámaʔ naʔł canmn̓ cy̓ʕapəl̓x n̓cíqlaʔxʷm̓əl̓x. iʔ sn̓ʕ̓ay̓ckstx sl̓mis iʔ tm̓xʷúlaʔxʷsəl̓x uł k̓sikstmn̓tm̓ t kʷúkʷaʔ, maʔmaʔmín̓tm̓. sic itlíʔ iʔ łəp̓úlaʔxʷtn̓ xiʔúst t tm̓xʷúlaʔxʷs iʔ sn̓ʕ̓ay̓ckstx. xc̓twil̓x łə ksk̓aw̓spíx̌m̓səl̓x, łə kskłqaqxʷl̓xm̓s, uł łə kstixʷm̓səl̓x t sp̓y̓qałq. itlíʔ uł ʔim̓x k̓ik̓m̓ yʕat iʔ sn̓ʕ̓ay̓ckst k̓l̓ ʔaw̓tím̓tks iʔ tm̓xʷúlaʔxʷsəl̓x. iʔ k̓ʷiƛ̓t xʷuy̓y̓ k̓l̓ w̓knaʔqín̓ k̓l̓ syilx ilíʔ t̓ql̓im̓x, uł iʔ k̓ʷiƛ̓t t̓iʔ ilíʔ kʷliw̓t l̓ tm̓xʷúlaʔxʷsəl̓x. sic itlíʔ iʔ Mír̓ika kʷiłtm̓ iʔ tm̓xʷúlaʔxʷsəl̓x k̓a n̓ʔiƛ̓l̓tk laʔkín̓ iʔ sn̓ʕ̓ay̓ckstx kiʔ kʷliw̓t. iʔ k̓ʷiƛ̓t niʕ̓áy̓p ilíʔ kʷliw̓t, iwá lut k̓im̓ t̓ sqlxʷúlaʔxʷ. iʔ k̓ʷiƛ̓t ʔim̓xəl̓x k̓l̓ sn̓x̌ʷiyałpítkʷ k̓l̓ n̓caʔlíwm̓. l̓ ʔupn̓kst uł x̌əx̌nut cl̓kłʔupn̓kst uł tim̓ł (1958), Kánata kʷis aʔ c̓iw̓t iʔ sn̓ʕ̓ay̓ckstx sqlxʷúlaʔxʷ. ʕapnáʔ, iʔ sn̓ʕ̓ay̓ckstx kswits kskʷn̓núiʔs iʔ n̓ʔiƛ̓l̓tk k̓ałʔál̓qʷ tm̓xʷúlaʔxʷsəl̓x. yʕat spin̓tk iʔ sn̓ʕ̓ay̓ckstx cʔúl̓luʔs l̓ piyʕáʔ, l̓ ksp̓iƛ̓m̓tn̓ kaʔ cúlluʔs ilíʔ. ilíʔ ksn̓k̓ʕaʔm̓n̓ uł ksn̓tm̓tm̓niʔtn̓. ilíʔ uł xʷk̓ʷn̓tisəl̓x iʔ sn̓tm̓tm̓niʔtn̓ laʔkín̓ kaʔ clq̓liq̓ iʔ snəqsilxʷsəl̓x uł ml̓mil̓təl̓x.