Wp/nyn/Cameroon
Cameroon, omu butongore Republic of Cameroon, n'eihanga omuri Afirika eya rwagati. Nebagana ensharo na Nigeria omu burengyerwa-izooba n'omumatemba, Chad omumatemba g'oburengyerwa-izooba, Central African Republic omu burugwa izooba, Equatorial Guinea, Gabon, hamwe na Republic of Congo omu mashuuma. Cameroon eine ekichweka aha Bight of Biafra, ekicweka kya Gulf of Guinea, hamwe n'enyanja Atlantic. Omwanya gwa Cameroon nimurungi ah'obwokuba eri hagati y'amahanga g'oburengyerwa-izooba bwa Afirika hamwe n'amahanga g'ahagati ya Afirika. Cameroon eyina bantu miriyoni 31 kandi nibagamba endimi 250 ez'enzaarwa, oihireho orungyereza n'orufaransa ezikukozesebwa nka entongore. Obukristaayo niryo diini erikukira obwingi omuri Cameroon, hamwe n'abantu bakye abasiraamu hamwe n'enyikiriza y'obuhangwa. Endembo za Cameroon ezirimu abantu baingi ni Douala aha mugyera Wouri, orurembo rwayo oruhango omu by'obushubuzi hamwe n'omwanya gw'aha nyanja; Yaoundé, orurembo rwayo oruhango omu by'obutegyeki; hamwe na Garou. Limbé omu mashuuma g'oburengyerwa-izooba, eine omwanya gw'enyanja.
Obwebembezi
[edit | edit source]Ekiro 1 Okwezi kw'okubanza omuri 1960 Cameroon ekatunga okwetegyeka kuruga ari France. Omwebembezi w'eihanga Cameroon ni Paul Biya era yebembeire eihanga rino kuruga omuri 1982 ahanyima ya Ahamadou Ahidjo kurekura obwebembezi; akabaho nk'enganzi y'eihanga kuruga omuri 1975 kuhisya omuri 1982. Eihanga rya Cameroon niritegyekwa nk'eihanga ry'omwebembezi w'eihanga. Omwebembezi w'eihanga rya Cameroon naatooranwa omu karuuru kandi nateekaho ebiragiro, arikureeberera ebitongore bya gavumenti, arikuduumira amahe, naateesa, nahamya endagaano, kandi naarangirira embeera y'akabi.[1] Omwebembezi w'eihanga naatoorana abakozi ba gavumenti aha rurengo rwona, okuruga aha nganzi y'eihanga (orikureebwa nk'omwebembezi wa gavumenti omu butongore), okuhisya aha ba gavana b'amasaza hamwe n'abakuru omu divizoni. Akaruuru k'abantu boona nikabawo buri myaka mushanju.[2]