Wp/nij/Genesis 2

2:1 Maka tampan langit tuntang petak tuntang kare taloh awang huange jari hapus.

2:2 Balalu hong andau kaujue Hatalla jari mahapus kare gawin Aie manjadian taloh handiai, tinai Ie malayan intu andau kauju.

2:3 Maka Hatalla mamberkat andau kauju te tuntang manyewut andau te barasih, basa andau te Hatalla malayan bara kare taloh gawin Aie limbah Ie jari manjadian kare taloh japan Ayue.

2:4 Kalote ampin saritan gawin Hatalla manjapa langit tuntang petak tuntang kare taloh awang huange.

Kabon Eden

2:5 Katika Hatalla manjapa langit, petak tuntang kare taloh huange, maka metoh te hindai aton tumbo kare kayu atawa kare ramon petak ije beken, basa Hatalla hindai mampalawo ujan, tuntang hindai aton olon je akan nguan petak te.

2:6 Tapi danum manampara lembut bara petak tuntang mambisa hapus petak.

2:7 Limbah te Hatalla manduan petak isut tuntang manampae manjadi ije biti olon, balalu mahimon tahaseng pambelom akan lowang uronge, maka olon te belom.

2:8 Limbah te Hatalla manampa kabon Eden intu hila timor tuntang mingkes intu hete olon je jari inampa Awie.

2:9 Tinai Hatalla mampalembut bara petak sepsimpan ampin kare kayu je bahalap tuntang kare buae mangat indu kinan. Intu bentok kabon te tumbo ije batang kayu je hapa mangasene taloh je bahalap tuntang taloh je papa.

2:10 Aton ije sungei je mahasor bara kabon Eden; mambisa kabon te, tuntang intu luar Eden sungei te hambilang manjadi epat sampang sungei.

2:11 Je nomor ije bagare Pison; sungei te mahasor mangaliling tanah Hawila.

2:12 Hete aton amas tulen tuntang taloh je mangat ewaue je bahali gaue, tuntang kare batu permata.

2:13 Je nomor due bagare Gihon; danume mahasor mangaliling tanah Kus.

2:14 Je nomor telo bagare Tigris tuntang mahasor hong hila timor Asur. Je nomor epate bagare Euprat.

2:15 Limbah te Hatalla mina olon te hong kabon Eden mangat manguan tuntang mahaga kabon te.

2:16 Hatalla hamauh dengan olon te, “Ikau tau kuman bua bara kare batang hong kabon toh,

2:17 baya bua bara batang je manenga pangatawan tahiu taloh je bahalap tuntang taloh je papa ela ikau kumae; amon ikau kumae, ikau pasti matei andau te kea.”

2:18 Palus Hatalla hamauh, “Dia bahalap olon belom kabuate. Aku handak manampa sobate je cocok akan mandohop ie.”

2:19 Limbah te Hatalla manduan petak isut tuntang manampa kare macam meto hong petak tuntang meto hong langit. Kakare meto te uras iimbit Hatalla manalih olon te mangat manampayah narai aran je handak inengae akan kare meto te. Kalote tamparan meto hunjun petak tuntang penda langit mandino arae mije-mije.

2:20 Kalote olon te manggare kare meto hunjun petak tuntang penda langit. Tapi jaton ije bara kare meto te je tau jadi kawale je cocok akan mandohop ie.

2:21 Palus Hatalla mawi olon te batiroh tujah, tuntang metoh ie batiroh, Hatalla mampalua ije tulang barawar bara bitin olon te, palus manutup awae hapan isi.

2:22 Bara balawar te Hatalla manampa ije oloh bawi, palus mimbite manalih olon te.

2:23 Maka olon te hamauh,

“Toh ie, oloh je sama dengangku –

tulang bara tulangku tuntang isi bara isingku.

Inggareku ie oloh bawi, awi ie induan bara oloh hatue.”

2:24 Jete sababe oloh hatue malihi bapae tuntang indue, tuntang hinje dengan sawae, balalu kadaduee te manjadi ije.

2:25 Oloh hatue tuntang oloh bawi te halowai, tapi ewen dia mahamen.